@ghdnews.in@

GHD News, Dec 30, 2025: Bangladesh a·songni gitcham Prime Minister aro Bagladesh Nationalist Party (BNP)-ni Chairperson Khaleda Zia, ru·uta sal somoirangna saani ja·man, December 30 tarik Monggolbar pringni 6 bajimango an·tangni ka·sagipa dedrang-su·drang, mahari ma·drangko dongale a·gilsakko watangaha ine Bangladesh Nationalist Party (BNP) facebook page-o parakataha.

Khaleda Zia, bilsi 80 gapaha, ua 1945 bilsini August 15 tariko India a·songni East Bengal-o donggipa Dinajpur songo atchiaha, ua song da·ode Bangladesh-o ga·akaha. Ua Bangladesh a·songni skanggipa me·chik Prime Minister ong·e, 1991-oni 1996-ona aro 2001-oni 2006 bilsiona dangdike on·angaha

Khaleda Zia, ru·uta somoirangna be·en an·senggijaniko man·ahani gimin, uko changni chang sanna bananiko dakaha, indiba obosta namjabatroroahani gimin, re·anggipa November 23 tariko Dhaka-ni Evercare Hospital-o sanna gita ra·angaha.

Khaleda Zia, Zia-ur-Rahman-ko bia ka·aha aro uamango Depante sakgni gnangchim, uamangara Tarique Rahman aro Arafat Rahman ong·achim.

Khaleda Zia-ni obosta namjabatroroahani gimin uko Dhaka-ni Specialised Private Hospital-o sannaha, indiba uko namatpilna man·jaha ine uni doctor Robibar salo parakataha. Uni dal·batgipa depante Tarique Rahman jean BNP-ni Acting Chairman, bilsi 17-ni ja·man Bangladesh-o a re·bapilaha aro ua nokdangni manderang baksa Dhaka-ni Evercare Hospital-ona re·ange ma·gipako bon·kame grongrikaha.