@ghdnews.in@
.
Tura, Dec 4, 2025: Garo Hills Autonomous District Council (GHADC)-ni ning·o donggipa a·jarangoniko koela aro ro·ong salruraenggipa garirang, nangana bate gatpretenba salruraengani gimin, Tura-ni MDC aro BJP-ni State Vice President Bernard N Marak matnangataha. Garo Hills-o iandake niam gri koela aro ro·ong salruraaniko champengchina GHADC-ni Chief Executive Member (CEM)-na sedoataha.

Marak-ni CEM-na seatgipa chittio janapatani gitade, Indian Constitution-ni Article 141-o pangchake, koela aro ro·ongrangko salrurana gita Meghalaya High Court-ni dongimin niamrang dong, indiba GHADC-ni ning·o koela aro ro·ong salruraenggipa garirang, challan, TNT aro gipin nangchongmotgipa lekkarang gri salruraengani gimin, High Court-ni dongimin niamrangko pe·ani ong·enga.

“GHADC-ni a·jao iandake koela aro ro·ongrangko salruraaniara, High Court-ni dongimin niamrangko pe·anisan ong·jaenga, indiba Motor Vehicles Act 1988-ni Section 113-115 aro Sixth Schedule-ni ning·o on·gimin bilrangko pe·ani gitaba ong·enga,” ine Tura MDC parakataha.

Indake, GHADC-na Sixth Schedule-ni ning·o on·gimin bilrangko jakkale, High Court-ni dongimin, niam gita koela aro ro·ongrangko salna gita ge·etaniko on·china Marak, GHADC-ni CEM-ko didiataha.

Niam gita GHADC-ni a·jao koela aro ro·ongrangko salruraengon, challan, TNT aro gipin nangchongmotgipa lekkarangko tarichina ge·etaniko on·china Marak GHADC-ni CEM-ko didiataha.

Dongimin niamrango pangchake, niam pe·giparangni kosako rakgipa ja·kurangko de·china aro niam pe·gipa garirang baksana koela aro ro·ongrangko rim·china gitaba Tura-ni MDC, GHADC-ni CEM-ko didiataha.