Tura, Sep 201, 2025: Sonibar salo Tura Christian College (TCC)-ni chang 8-gipa Foundation Day-ko Govt. Girls Higher Secondary Skulo maniangaha. Ia maniaona Meghalaya Legislative Assembly-ni Warachakenggipa dolni dilgipa aro Songsak-ni MLA Dr. Mukul M. Sangma mongsonggipa sokgipa ong·e bakko ra·angengon, Captain Williamson Sangma State University-ni Registrar Ambrose Ch. Marak mande ra·e okamako man·e, bak ra·angpaaha. Uamangna agreba ia tom·anio, niksenggipa manderang, songsalko dilgiparang, NGO-ni dilgiparang, Mondolini dilgiparang, Tura-o donggipa College-rangni skigiparang, ja·del bolchagiparang aro Rongbakgre-ni Nokma dongpae bak ra·angaha.

TCC-ni Vice President Beryl B. Sangma, Tura Christian Academy (Higher Secondary Section)-ko 2010 bilsio a·bachengataoni da·alona chalaibaani gimin talate on·angaha.
Indake, Tura Baptist giljani dilgiparang lekka porani bidako on·na on·gilpaani gimin aro niksamsoanirangko aganangaha.

Ambrose Ch. Marak, TCC-ko a·bachengatgiparang, dangdike on·giparang aro faculty member-rangna nama skaniko on·an baksa mandesal ong·e, sakgipinrangna dangdike on·china didiangaha.

Mongsonggipa sokgipa Dr. Mukul M Sangma jinmana aganprakangengon, skigiparang ‘Blacksmiths’ ba silkamal gita ong·a, uamang chatro chatrirangni taningko matsrame wil·giparang ong·a. Gitalgipa cholrangko ra·anio Policy Maker, ma·a paarangni aro songsalni dakna nanggni dai ong·a ine aganangaha.

Indake manianio, skigiparangoni bimchipe dangdike on·ahanina mande ra·pilskaaniko dake Baldhora M. Sangma aro Sungjungmenla M. Sangma-na Best Teacher Award ba boksisko on·angjolaha.