@ghdnews.in@

Resubelpara, Dec 3, 2025: North Garo Hills a·jani Rongrong constituency-ni ning·o donggipa New Kantolguri songo Park University-ko kulina a·dok sorkarini tik ka·engani gimin Rongrong constituency-ni MDC Rinaldo K Sangma sing·doataha.

Ia Park University-ni bidingo a·dokni Skotong Minister Conrad K Sangma-na u·iatchina gita North Garo Hills a·jani Deputy Commissioner-na sedoatenba, New Kantolguri songo donggipa biapara District Council-ni kachario Judicial Inquiry ong·engkua, maikai ua biapo a·dok sorkari, Park University-ko kulina gita lekkarangko tariaha ine Sangma sing·doataha.

“Jaipur a·dokni Gyansham Bhora Charitable Trust, New Kantolguri songni bigha 455-ko a·ao Park University-ko kulina a·dokni Cabinet, re·anggipa November 26 tariko ra·chakaha ine anga koborko man·aha. Ia biapni bidingo District Council-ni kacharion Judicial Inquiry ong·kuenga ong·ode, maikai ia biapo Park University-ko kulina a·dok sorkari, proposal-rangko, file-rangko aro administrative note-rangko tarina man·aha,” ine Rongrong-ni MDC sing·doataha.

Indian Constitution-ni Sixth Scheduled a·jarangode Autonomous District Council (ADC)-rangsa bilko man·a aro a·dok sorkaride skatang a·arangko a·kangna bil dongja ineba Sangma parakataha.

“Ia a·arangara GHADC-ni ning·o ga·akgipa, Sixth Scheduled-ni ning·o chel·chakako man·gipa biaprangsa ong·ani gimin a·dok sorkaride a·arangko kangna bil dongja aro GHADC-ni kosako re·badena man·ja. Uni gimin Maharirangni permission gri aro GHADC-ni ra·chakani gride ia biapko a·dok sorkari kangdrana bil dongja,” ine Sangma parakataha.

Sixth Scheduled-ni a·jarango a·dok sorkari aro district administration-ni District Council-ko re·badena jotton ka·aniara GHADC-na on·gimin bilko pe·ani ong·enga ineba Sangma parakataha.

Indake ong·engon, New Kantolguri reserve land-ni bidingo Judicial Inquiry-ko matchotkujaskal, ua biapo Park University-ko kulina ja·ku de·aniko aro pilak kamrangkon dontongatchina, Rongrong-ni MDC, a·dok sorkariko didiataha.