@ghdnews.in@

Tura, Nov 29, 2025: Garo Hills Autonomous District Council (GHADC)-na dingtang Electoral Roll-ko tariani bidingo, A·chik State Peoples’ Front (ASPF), a·dokni Governor CH Vijayashankar-na sedoataha.

ASPF-ni Governor-na sedoatani gitade, GHADC-ko a·bachengaonin A·chikrangni bilrang, daka rikanirang, jattangchi sason ka·ani aro niam reti-rangko ripingenggipa aro A·chik a·songko chel·chakbaenggipa institution ba bimang ong·ani gimin ia bimango Tribal ong·gijagipa ba gipin jatrang bak ra·aniara kragijani aro niamni a·palo ong·enga, ine janapataha.

“GHADC-na Sixth Schedule-ni ning·o on·gimin bilko jakkalanio Scheduled Tribe (ST) jatrangonisa ong·na nanga, maina ia miksonganiosa GHADC-ko A·chik jatna on·aha,” ine ASPF parakatenba, GHADC-na dingtang Electoral Roll-ko tarianio kamrangko niatchina a·dokni Governor-ko didiataha.

Somoi gita ja·ku de·anichisan Sixth Schedule-ni miksonganirangko ripingna gita man·aigen. GHADC-na dingtang electoral roll-ko tarianiara niamosan ong·enga ong·ja, indiba District Council-ni miksonganiko rakkina gita nangchongmotenga ine ASPF parakataha.

A·dokni Governor-an a·doko songdongenggipa Tribal manderangko aro uamangni bilrangko chel·chakgipa ong·a. Uni gimin mikkangchi GHADC-ko aro Tribal manderangko chel·chakna gita ja·kurangko de·china ASPF, a·dokni Governor-ko didiataha.