@ghdnews.in@

Tura, Nov 29, 2025: Tura-ni MDC aro BJP-ni State Vice President Bernard N.Marak, Social Media-o an·tangko ‘Duplicate Tribal’ ine seahani gimin Balachanda-ni gitcham MDC Sofiur Rehman-ni kosako, Scheduled Castes & Scheduled Tribes (Prevention of Atrocities) Act, 1989-ni ning·o pangchake badi (FIR) ka·doangaha.

Balachanda-ni gitcham MDC Sofiur Rehman, Tura-ni MDC Bernard N Marak-ko, Social Media-o ‘Ka·sara Dada na·aba Duplicate Scheduled Tribe (ST)-an ong·a’ ine matnangataha.

An·tangko ‘Duplicate ba tol·gipa Tribal’ ine seatanina, ua saksa seokako man·gipa Member of District Council (MDC) aro ST-ni member saksa ong·ani gimin, indake Social Media-o seataniara uko
‘chonnikani aro jat basee’ aganani gita ong·a ine Marak parakataha.

“Angni ST gadangko ‘tol·gipa’ ine matnangenba ia mande, angni kosako ka·mikkenatani, chonnikani aro jat baseaniko mesokani ong·a aro Sixth Schedule a·jao Tribal ong·gijagipa mande saksani indakgipa kamko mesokaniara, SC/ST Act-ni ning·o sastiko man·na keaa,” ine Tura MDC parakataha.

Marak-ni parakatani gitade, Balachanda-ni gitcham MDC Sofiur Rehman-ni Social Media-o iandake, Tura MDC-ni kosako matnanganiara ian skanggipa ong·jaha, maina ua batanggimin somoirangoba apsan daken uni kosako matnangenba, ka·mikkenataniko dakna jotton ka·ahachim.

Iani bidingo badi (FIR)-ko segatenba, ta·raken sandianiko a·bachengatchina aro ua gitcham MDC-ni kosako rakgipa ja·kurangko de·china Marak, badi ka·anio didiataha.