@ghdnews.in@

GHD News, Tura, Nov 202, 2025:: South Tura-ni gitcham MLA John Leslee K Sangma, Budbar salo, Congress dolo napangpilaha aro uko Meghalaya Pradesh Congress Committee (MPCC)-ni dilgiparang, kusi ong·en Congress dolona rimchaksoaha.

Meghalaya a·doko Congress dolko bilakatpiltaina rakbee kamrangko ka·engon, batanggimin salrango gitcham dilgiparang, dingtang dingtang dolrango napanggenchimoba, da·alo gitcham dilgiparang Congress dolona re·bapile a·doko Congress dolko mangrakbatatani ong·aha.

Re·anggipa October 29 tarikosan, a·dokni gitcham Minister aro Rangsakona-ni gitcham MLA Zenith M Sangma-ba TMC-ko wate Congress dolona re·bapilaha aro da·o TMC-o napanggipa bang·bata member-rangan, Congress dolona re·bapilna nidingtokenga.

Batanggipa 2022 bilsio a·dokni gitcham Skotong Minister Dr Mukul M.Sangma aro gipin MLA-rang baksa Congress dolko wate Trinamool Congress (TMC)-o napanggipa Salmanpara constituency-ni gitcham MLA Winnerson D Sangma-ba Congress dolona re·bapilna siengaha ine koborko on·aha.

Koborna u·iatani gitade, Salmanpara-ni gitcham MLA Winnerson D Sangma-ko, re·baenggipa November 26 tariko, Rangsakona-o Congress dolni tom·bimonganio, Congress dolona rimchaksona sienga. Re·baenggipa 2026 bilsio ong·atenggipa GHADC election-o ua Congress doloni susana gita party tikitna dorgasto galenga ine koborko man·soaha.

Kobor man·soani gitade, Zenith M Sangma-ni jikgipa Sadhiarani M Sangma-ba apsan salon Congress dolo napangnaba gnang. John Leslee K Sangma-ko Congress dolona rimchaksoengon, Garo Hills-ni manderang, NPP aro BJP-ni kamrangna kusi ong·tokjaengaha aro Congress dolni sorkari rikpiltainikosa nangniktokengaha ine Butbar salo, MPCC-ni dilgiparang parakataha.