@ghdnews.in@

GHD News, Tura, Nov 20, 2025: Re·anggipa November 17 tariko a·dokni Skotong Minister Conrad K.Sangma Jengjal-o rikgipa gital Pulis Station-ko nokdonggani salo Dadenggre-ni TMC MLA Rupa M.Marak-na maming kobor on·jani gimin, Marak, suk ong·gijaniko parakatenba, Iani bidingo a·dokni Skotong Minister Conrad K Sangma aro NPP-chi dilenggipa MDA sorkariko sing·doataha.

Marak-ni parakatani gitade, sorkarini dingtang dingtang program-rangko Dadenggre Constituency-ni ning·o ong·atgenchimoba, pangnan a·dok sorkari aro District Administration, warachakenggipa dolni MLA-rangkode okamrongja, indiba apsan program-rangko ong·atgenchimoba, Dadenggre constituency-o maming namroro silroroanirang dongja ine a·dokni Skotong Minister, Opposition MLA-rangko matnangskaronga.

November 17 tariko Jengjal Pulis Station-ko nokdonggaani saloba uko okamatjahani gimin, ua suk ong·gijaniko parakatengon, ian badiaba party-ni program ong·jachim, indiba sorkarini program ong·ani gimin joltangni MLA-de dongpana nangachim ine Marak parakataha.

A·dok sorkari aro Airports Authority of India (AAI)-ni gisepo Baljek Airport-ko taridapna Memorandum of Understanding (MoU)-o soi ka·grikani bidingo janapatengon, ia program-onaba, sorkarioni aro district administration-oni darangba okamatjaha, indiba ripengrangsa ia program-ni gimin u·iataniko man·e, ua program-ona an·tangan re·bae bakko ra·eaha ine Dadenggre-ni MLA parakataha.

“Anga saksa Dadenggre constituency-ni MLA ong·e, constituency-tangni ning·o ong·atenggipa sorkarini program-rango bak ra·pana nangchongmota, indiba a·dok sorkari aro district administration, angko nichanggalrongani gimin anga da·alo suk ong·ja”, ine Marak parakataha.

“Sorkarini program-rangona angko okamgijaniara changsa changgni ong·jaha, indiba sorkari program-ko ong·ata changantian angko nichanggalrongani giminsa anga suk ong·ja. Ringgi Dolongko rikna pangchakani rong·teko songani somoioba angko okamjaha aro ua somoio local MLA-kon okampilgija, Dadenggre-ni gitcham MLA James K Sangma-kosa chief guest dake okamskaaha. Bang·a manderangan angko maini gimin dongpaja ine sing·attokaha aro uamangan angko okamjani gimin re·angna man·jaha ine aganchakna nangaiaha”, ine Dadenggre-ni MLA parakataha.

“Maini gimin angni kosako sorkari aro district administration kamko ka·enga anga ma·sija, indiba haida angni manderangna anga Assembly-o ku·rang on·engani giminsa angko indake kalengakon ine anga chanchia. Anga an·tangni constituency-na aro manderangna ku·rangko on·na gitasa dilgipani kamko ra·aha aro dilgipa ong·e angni manderangna ku·rang on·anian ong·a,” ineba Marak parakataha.

Sorkarini program-rangko party-ni program dake ra·jachina didiatenba, “Anga local MLA ong·e kamtangko ka·gen aro sorkariba indakgipa program-rangona local MLA-ko okamate kamtangko ka·na nanga. Ia program-rangde party-ni program ong·ja, indiba sorkarini program-sa ong·ani gimin local MLA-de dongna nangchongmota” ine Dadenggre-ni MLA parakataha.