@ghdnews.in@

Shillong, Nov.19, 2025:All Jaintia Muster Roll Workers Labour Union (AJMRWLU) aro All Meghalaya Muster Roll Progressive Workers Union (AMMRPWU) baksa nangrime, re·baenggipa November 22 tarik Sonibar salni pring 10 bajio General Meeting-ko Shillong Malki Ground-o ong·atenga. Uni gimin dingtang dingtang government department-rango kamko ka·enggipa pilak Muster Roll Worker-rang aro Casual Worker-rang General Meeting-ona re·bae bak ra·epachina AJMRWLU-ni Chairman Khroo L.Pariat mol·molataha.

November 22 tariko General Meeting-ko ong·atani miksongara, skanggipa 2023 bilsionin Revised Floor Rate-ni Arrear-rangko sorkari bariatchipjaengani aro maini gimin bariatjaenga uko talatjaengani gimin jinma chanchie dabianggen. Gnigipa October 2025 aro April 2026-ona Variable Dearness Allowances (VDA)-ko on·china dabianggen. Gittamgipa Retirement ong·gimin RCD-rangna Employees Provident Fund (EPF)-ko on·china dabianggen. Brigipa Maternity Leave aro Benefits ba man·gnirangni gimin chanchigen.

Uni gimin, an·tangtangni gamchatgipa somoiko choljokate, meetingo bak ra·epachina Pariat mol·molaraha.