@ghdnews.in@

GHD News, Shillong,Nov 16, 2025:Bilsianti manirongbaenggipa National Press Day (NPD)-ko November 15 tariko Shillong Club Hall-o maniangaha. Ia National Press Day-ko Shillong Press Club (SPC), Meghalaya Editors and Publishers Association (MEPA) aro Information & Public Relations (IPR) baksa bakrime ong·atangaha.

Ia National Press Day-ko maniaona, Shillong Press Club-ni gita okamatako man·e, Garo Hills Press Club (GHPC)-ni dilgiparang Cosmos K.Sangma President, Dalseng A.Sangma General Secretary, Roberto G. Momin Joint Secretary, Diksil M.Marak Organising Secretary aro Francis Hasdak skanggipa changna National Press Day-ko maniao bakko ra·angaha.

Indake ia National Press Day-ko maniani salo Information & Public Relations (IPR)-ni Minister In-Charge Lhakmen Rymbui aro IPR-ni Commissioner & Secretary Vijay Kumar Mantri mongsonggipa sokgipa ong·e bakko ra·angaha.

IPR Minister, mongsonggipa sokgipa ong·e, tom·anio jinmana aganprakangengon, news-rangko parakatenngon, kobor-rangko name ning·tue am·sandianiko dakani ja·mansa songbad-rango parakatchina didiangaha. Una agreba Journalism-ni ge·bri nangchongmotgipa krongrangko ua janapangaha, jekai manderangni ka·donganiko rakkiani, technology-ko jakkalani bidingo name jako ra·e kam ka·ani, songbad-rango gatgiminko an·tangan daitoko ra·e kakket ong·aniko mesokani.

Name am·sandigija aro ong·gija kobor-rangko gatani bidingoba, Rymbui adita kattarangko janapangaha, je kobor-rangko gatna skangba kakket obostani gimin, am·sandie kamrangko ka·china ua didiangaha.

News-rango gatengon, dingtangggrikaniko, gisiko ding·doataniko ra·bagija, saksa sakgipin baksa nidikgrikani gisiko nabatgija koborrangko on·china didiangaha.

Indake ia National Press Day-ko maniao, Shillong Press Club, Central Body-ni Executive Committee-ona Garo Hills Press Club-ni President Cosmos K.Sangma-ko seokangaha.