@ghdnews.in@

Chokpot, Nov 13, 2025: South Garo Hills a·jani Chokpot Civil Sub Division-ni ning·o donggipa Paromgre songo niamgri Scientific Coal Mining-ko dakengani bidingo so·sojengjeng ong·engani gimin, Chokpot jolni nangrimgimin NGO-rang aro songni manderang skanggipa July 5 tariko nina re·angchengaha. Uandake gnigipa October 18 tariko Chokpot-ni BDO, SDPO aro Chokpot Thana-ni OC baksa nina re·angaha aro bang·bea bakosrangko koela bikotna drilling ka·gipa biapo nikaha.

Indiba November 11 tariko gittamgipa changna Chokpot-ni nangrimgimin NGO-rang baksa Chokpot Civil Sub Division-ni Civil-SDO, Assistant Superintendent of Pulis (ASP), SDO, OC, Meghalaya Polution Control Board (MPCB)-ni Officer, State Forest Department, Garo Hills Environment Protection Society (GHEPS)-ni member-rang, GSMC HQ-ni dilgiparang aro songni manderang nina re·angtaiode, drilling ka·gipa manderangni ra·bagipa bokosrangko nikjaha, ine GSU Chokpot Regional Unit-ni President Jish A Sangma parakataha.

GSU President-ni parakatani gitade, drilling ka·e man·gipa a·ningni bosturangko chimongna ra·bagipa bakosrangko salode salanga dongja, walo manderangni tusimitting somoiosa salangna nanga. “Chinga saniba nokrango dongengnaba donga ingipao songrangoniko sandiaha, indiba bakos ge·saba dongjaha. Indiba drilling machine-kode km 2 ba 3 mang chel·gipa mande nokona ra·ange donenga” ine Sangma parakataha.

Iani bidingo Chokpot jolni nangrimgimin NGO-rang, South Garo Hills a·jani Deputy Commissioner (DC)-na lekka sedoatani ja·man, DC-ni ge·etaniko man·e, dingtang dingtang sorkari officer-rang November 11 tarik Monggolbar salo niamgri koela bikotenggipa biapko nina gita Paromgre songona re·angaha. South Garo Hills a·jani District Administration, Chokpot-ni Civil SDO, Assistant SP, Chokpot Thana-ni OC, MPCB-ni Officer, State Forest Department-ni re·ange nianio nikani gitade, ua biapara non-forest ong·na kraja aro dingtang dingtang mingsinggipa chidare-rang, warirang, tourist spot-rang nosto ong·gen, ua biapo koela bikotode ine ma·siaha.

Ua somoio, officer-rang baksa mining geologist-rang dongjani gimin, koela dongama dongja, drilling ka·anio mai bosturangko man·achim uko ma·sijaha. Indake ong·genchimoba, jeko officer-rang nika, uko chubata gadangni officer-rangna seatdoatgen ine NGO-rangna aro songni manderangna parakangaha. Uni gimin, officer-rang mai report-ko on·ata, ua report-ko sengkuenga ine GSU President parakataha.

Re·anggipa 2010 bilsio Paromgre songni manderangna, Nokmani suale on·gipa koela quarry-tangtangko saoba miter 50 saoba miter 60 dake, Georgemon Marak-na palgipa biap Guangdare aro Chibilbang jolonikosa drilling ka·skaha. Georgemon Marak-ni hectare 150 scientific mining-na bregipa biapde ong·jachim, ine GSU President parakataha.

Uandake Paromgre songo niamgri koela bikotna drilling ka·engani gimin, namnikgijaniko mesokna lekkarango see poster-rangko ra·bite, jinma jegalsoaha.

Apsandaken, NGO-rangba Paromgre songo koela bikotna drilling ka·aniko jegale segipa chittiko, MPCB-ni officer-na on·atjolaha.