@ghdnews.in@

Shillong, Nov 13, 2025: Re·anggipa May 23 tariko, Indore songjinmaoni bia ka·daldale honey-moon-na re·bagipa, Raja Raghuvanshi-ko so·otgipa uni jikgipa Sonam Raghuvanshi aro uni mikchagipa Raj Khuswaha aro gipin manderangni kosako pulisrang bakan gnigipa Chargesheet-ko ka·gen ine Sombar salo, East Khasi Hills a·jani Superintendent of Pulis (SP) Vivek Syiem parakataha.

Syiem-ni parakatani gitade, gnigipa Chargesheet-o sakbonga manderang, chong·motan Raja Raghuvanshi-ni jikgipa Sonam Raghuvanshi, uni mikchagipa Raj Khuswaha aro gipin sakgittam Akash Singh Rajput, Vishal Singh Chauhan aro Anand Kurmi-ko biming mingaha.

“Gnigipa chargesheet-ko chinga ka·na siengaha aro Hyderabad-ni CFSL-oniko forensic report-rangko man·soahaon chinga gnigipa chargesheet-ko on·na man·gnok,” ine SP parakataha.

Ia chargesheet-ko December jani skanggipa antio ka·na gita somoiko donaha aro ia chargesheet-ko November-ni gittamgipa antion ka·na ka·dongenga ineba Syiem parakataha.

Raja-ko so·otgipa sakgipin manderangni kosako nanga gita sakkirang dongama ine sing·anina aganchakengon, “Chinga skanggipa forensic report sokbaon nichengna nanggen. Matnanga man·gipa manderangni kosako chu·onga gitan sakkirang donga, indiba forensic report sokbahaon chinga sakkirangko bilakbate mesokna man·gen,” ine Syiem aganaha.

Raja Raghuvanshi-ko so·otanio mongsonggipa mande, altuaen jaminko man·naba gnang ine chanchichipanina aganchakengon, ia mamlako Special Investigation Team (SIT) rim·aha aro skanggipa chargesheet-koba bilaken on·aha ine SP parakataha.

“Jaminko on·anide kacharini jakosa ong·aia, pulisrangni jako ong·ja,” ine SP aganaha.
Skanggipa chargesheet-ko re·anggipa September-ni 5 tariko, Sohra Sub-Division Court-na on·aha.

Raja Raghuvanshi-ko so·otanio sakkirangko nisie galahani gimin Lokendra Tomar, Balla Ahirwar aro Silome James-ni kosakoba pulisrang, dingtang chargesheet-ko ka·dapna sienga ineba Syiem parakataha.