@ghdnews.in@

Chokpot, Nov 12, 2025: Chokpot-ni nangrimgimin NGO-rang unikora Paromgre songni Chra-depanterang pilak songni manderang hectare 150 a·aoniko coal mining ka·aniko jegale, South Garo Hills a·jani Deputy Commissioner (DC)-na sedoatani gimin, DC-ni ge·etaniko man·e, sandina gita District Administration, Meghalaya Pollution of Control Board (MPCB), Chokpot-ni Civil SDO, Pulis Officer-rang aro Forest Department-ni officer-rang Butbar salo Paromgre songona re·ange, Coal Mining ka·na cho·gimin aro rama tarigimin biaprangko niangokaha.

South Garo Hills-ni ADC P.R. Sangma, Chokpot Sub-Division-ni Civil SDO, Paromgre songona re·ange nianio nikani bidingo talatani gitade, “Chinga maimairangko nika gimikon kosakchina sedoatgen, bisong maiko ka·gen kosakonisa jekoba aganchakgen” ine aganaha.

Chokpot-ni nangrimgimin NGO-rangni parakatani gitade, ua biapo dam 12 chiringrang donga uarangara Kakkija, Dareng, Rompa, Rongdik jeon Redingsni, Wari Chora, Abong Chigat, Jawa Wari, Aginma, Imilsang Dare-rangko man·chapgipa chibimarang ong·achim.

Ua biaprangara dingtang dingtang matburingni dongram biap ong·a. Ua biaprangko koela bikotgenchimode, matburing gimagnok aro ua biaprangko nosto ka·genchimode, A·chik a·songna dal·bea gimaani ong·gen, ine NGO-rang parakataha.

Chokpot-ni nangrimgimin NGO-rang jekai GSU, CVC, ADE, FKJGP, GSMC aro Paromgre songni Chra-depanterang baksa bil gnanggipa sorkari officer-rang baksa Paromgre jolo koela bikotgipa biapona re·ange am·sandianiko dakaniara, namgipa ja·ku de·ani ong·enga. Maina a·gilsak gimikon da·alo global boiling ong·anirangko nike Environment Act, 1986, Water Act, 1974, Forest Act 1980, Animals Act, 1972, Pollution Act, 1981-o pangchake a·brirang jeon buring bolgriman gapgipa, matburing bang·gipa, do·o-matrang jelgipa, me·pilprang rogipa chiring bisbisikko ripingna krachongmota, ine GSMC HQ-ni Organising Secretary
Jason Tekrang M. Sangma parakataha.