@ghdnews.in@

Tura, Nov.9, 2025: Tura Dakopgre-o rikgipa Meghalaya Public Service Commission (MPSC) office nok gitalko a·dokni Skotong Minister Conrad K. Sangma, Sonibar salo oprake on·angaha.

Gital MPSC office gitalko oprake on·ani salo Skotong Minister jinmana aganengon, ia “MPSC office gitalko ra·bana man·anichi, Garo Hills-ni bang·a manderangna namen dakchakbeani ong·gnok ine anga ka·donga. Bang·a chadamberangan MPSC porikkarangko sena gita aro interview-rangko ra·na gita walgimik garirango Shillong-chi re·rurana nangachim aro chel·begipa ramarangko neng·bee walgimik songreani ja·man, neng·takgijan porikka sena aro interview-rangko ra·na gita nangachim. Indakgipa obostrangchi gisik aro be·enni gita bang·a neng·nikaniko man·a baksana bang·a tangka paisarangko koros ka·na nanga, indiba da·alo ia gitalgipa MPSC Office nokko ra·bae on·na man·anichi pilak chadamberangnan namgniko man·gnok aro Tura-on porikka aro interview-rangko ra·na man·gnok,” ine aganangaha.

Skotong Minister, indakeba aganaha, “Ia MPSC office gitalan A·chik chadamberangna gamchatbegipa gam ong·a aro re·baenggipa salrango 99% chadamberang da·ode porikkarangna aro interview-rangna Shillong-chi re·rurana nanggijan porikka aro interview-rangko songtangon on·na ba ra·na man·gnok ineba parakangaha.

Ia MPSC office nok gitalon re·baenggipa November 14 tariko skanggipa MPSC porikkako seatgen ineba parakangaha.

Meghalaya Legislative Assembly-ni Speaker Thomas A. Sangma-ba program-o bak ra·e, aganangengon, “Ian Garo Hills-ni manderangna gisik ra·na krabeani aro rasong chabeani ong·a, jean kakketo aro nama miksonganio a·doko chalaianio namgipa chinko mesokani aro songsalni manderangko mikkango done kam ka·aniko mesokaniba ong·a,” ine aganaha.

Ia program-o West Garo Hills a·jani Deputy Commissioner Vibhor Aggarwal, Meghalaya Public Service Commission-ni Chairman Abraham T. Sangma aro government department-ni dingtang dingtang official-rangba bakko ra·angtokaha.