Shillong, Sept 14, 2024: Re·anggipa September 8 tariko Rajbala Pulis Station-ni Pulis Officer In-charge Victor Marak aro Second Pulis Officer In-charge Anthony Sangma, Silkata songni Sapiul Islam-ko Rajabala Pulis Station-ona okamte kragija sastirangko on·e, doka satahani gimin, New Bhaitbari-ni Sofior Rahman, Meghalaya Human Rights Commission (MHRC)-na online gita badi (complaint) ka·doataha.

MHRC-na badi ka·doatgipao janapatani gitade, Rajbala Pulis Station-ni Pulis Officer-rang, Sapiul Islam-ko bilongbee dokani ja·mano uko jamin (bail) on·e watataha, indiba Sapiul Islam bilongen saknaako man·ahani gimin, una nambata sanna bananiko on·na gita, New Bhaitbari CHC-oni Guwahati-ona referred ka·atha.

Uni gimin, saknaako man·gipa mandena kakket bichalko on·china badi nokgipa MHRC-ko mol·molataha. Uandake, badi ka·anio pangchake, ia mamlani bidingo namedake sandianiko dakchina, MHRC-ni Chairperson, September 13 tariko ge·etaniko on·ataha.

Indake, Sofor Rahman-ni badi ka·doatgipa lekka ba copy-ko Rajabala Pulis Station-ni Officer in-charge Victor Marak aro Second Officer in-charge Anthony Sangma-na watatenba, ia u·iataniko man·soani sal 20 gisepon, nanga gita aganchakaniko on·china MHRC ge·etaniko on·ataha.

Ia apsan badi ka·ani lekkako aro MHRC-ni ge·etaniko, Meghalaya a·dokni Director General of Pulis (DGP) aro West Garo Hills a·jani Superintendent of Pulis (SP)-naba wataha.