@ghdnews.in@

Tura, Nov 6, 2025: Chang 49-gipa Dama Bol 100-ko Doke Wangala ba 100 Drums Wangala Festival-ko Bristibar salo, Wangala A·dam Chibragre-o a·bachengataha aro ia Wangalaniko, Meghalaya a·dokni Skotong Minister Conrad K Sangma oprake on·angaha.

Bilsianti ong·atrongbaenga gitan, ia bisioba Dama Bol 100-ko Doke Wangalanio dol 10 Wangalgipa dolrang bak ra·angaha aro ua dolrangara, Tosekgre, Chidaogre, Rapdikgre, Chibragre, Dalbenggre, Wa·nok Damgre, Chepagre, Tura Wangala Troupe, Sadolbra, aro Gondenggre.

Indake chang 49-gipa Dama Bol 100-ko Doke Wangalaniko, Rev. Dilseng M Sangma aro Rev. Fr Januarius S Sangma-ni ku·rangchi Isolo bi·e a·bachengataha. Uni ja·mano ‘Dimdim Dimchong Dachichong’ Wangala gitko jinma ring·aha.

Ia chang 49-gipa 100 Drums Wangalaniko do·ga oe on·anio a·dokni Skotong Minister, Conrad Sangma, jinmana aganprakangengon, mikkang bilsiode, ia Dama Bol 100-ko Doke Wangalani bilsi 50 gapengaha aro ia Dama Bol 100-ko Doke Wangalani bilsi 50 gapaniko maniani bak gita Dama Bol ‘1000-ko Doke Wangalaniko’ skanggipa changna ong·atanggen, ine parakataha.

Mikkang bilsio Dama Bol 100-ko Doke Wangalani bilsi 50 gapaniko ga·subate manina man·na gita State Level Committee-ko songchina ku·pattiangengon, ia bilsi 50 gapaniko manianio pilak sorkari department-rangan Hundred Drums Wangala Festival Committee (HDWFC)-na dakchakanirangko on·anggen ine Skotong Minister ku·rachakangaha.

A·chik jatni daka rikani aro man·rikanirangko am·sandina gita, a·dok sorkari dingtang dingtang program-rangko a·bachengataha. Ia jatni daka rikani aro doka dam·anirangko am·sandie see rakkina gita a·dok sorkarini a·bachengatgipa, Chief Minister’s Research Grant-ni gimin Skotong Minister, jinmana talatangaha.

Ia Dama Bol 100-ko Doke Wangalaniko a·bachengatanio, Gambegre-ni MLA Mehtab Chandee A Sangma, a·dokni Chief Secretary Dr. Shakil Ahammed, West Garo Hills a·jani Deputy Commissioner, Vibhor Aggarwa, Tura-ni SP Abraham T Sangma aro gipin official-rangba bak ra·angtokaha.