Shillong,Sept 10,2024:A·dokni dakchakgipa Skotong Minister aro Home (Pulis)-ko jako ra·e nirokenggipa, Prestone Tynsong, blood pressure ong·e ga·akgropahani gimin Laitumkhrah-o donggipa Nazareth Hospital-ni ICU-o admit ka·aha. Preston Tynsong, blood pressure bilongani gimin bakan uko Sombar attamo hospital-ona ra·angaha aro doctor-rang namedake nirok simsakaniko dakenga.
Nokdangni manderang koborna parakani gitade, medical team uni blood pressure ong·ako namedake nirok simsakaniko dakengaha. Ua namkalahaode, uko private ward-ona ra·jitanggen ine parakataha.
A·dokni Department of Information and Public Relations (DIPR)-ni u·iatani gide, Tynsong-ko Sombar attamni 5 bajio Nazareth Hospital-ni Department of Neurosurgy-o admit ka·aha. Ua bilonge saengani gimin obostarang namsrangade ong·jaenga. Ua mamingkoba ma·sigija obostao ong·enga aro mikkrakatani ong·enga. Indake ong·genchimoba una namedake sanna bananiko on·enga ine parakataha.
