Tura, Nov 21, 2026: Re·anggipa ia jani 8 aro 9 tariko Tura Dakopgre-o donggipa PA Sangma Stadium-o ong·atanggipa Gospel Fest, 2026-ni bidingo talbate ma·sina gita, Right To Information (RTI) ka·aniko West Garo Hills a·jani District Administration (DA), an·tangtang aganchakani ba talate on·ani pal, A·chik Baptist Dal·gipa Krima (ABDK)-nasa pakwate on·atskaahani gimin, Tura-ni MDC aro BJP-ni State Vice President Bernard N Marak matnangataha.
Iani bidingo, West Garo Hills a·jani Deputy Commissioner-na seachi badi ka·doangenba, uni RTI ka·e sing·sandianio nangchakegipa sorkari department-rang an·tangtang aganchakgija, maini gimin, ABDK-ni Youth Director-nasa pakwatatskaaha ine Marak sing·doataha.
Marak-ni parakatani gitade, RTI Act 2005-ni Section 2 (h)-o pangchake, sorkari tangka paisarangko chu·onge ba bang·e on·jaskalde, toromni dolrang, bilrangko jako ra·na man·ja aro RTI ka·anirangna aganchakanide sorkarini kam ba daitosa ong·a.
Ia Gospel Fest-ko ong·atani bidingo a·dokni Skotong Minister Conrad K Sangma an·tangan, jinmana parakatahani gimin, District Administration, ia Gospel Fest-ko ong·atna bilko on·gipa aro tangka paisarangko dakchakgipa department ba official-rangoniko sing·sandie ra·na nanga, ineba Tura-ni MDC parakataha.
Ia Gospel Fest-ko ong·atanio chu·gimik korosrang, chu·gimik tangka paisarangko dakchake on·ani, Gospel Fest-ko ong·atgipa, official permission-rang aro ia Gospel Fest-na sorkari department-rangoninma, ma Skotong Minister-ni Office-oni tangka paisarangko dakchake on·aha, ia gimikkon talate on·china Marak dabiangaha.
Ia Gospel Fest-o jean International Gospel Singer gitko ring·e mesokangahachim, iana maikai tangka paisarangko on·aha, iani bidingo sing·doatengon, ia program-ko ong·atna sorkarini tangka paisarangko jakkalaha ong·ode, badita tangka paisarangko koros ka·aha, jinmana parake on·china Tura-ni MDC dabiangaha.
“Angni jegalanide, ia Gospel Fest-ko ba Mondolini kosako ong·ja, ine talatenba, angni RTI ka·aniko District Administration-ni Public Information Officer (PIO) an·tang aganchakgija, ABDK-ni Youth Director-na pakwate on·ahani giminsa da·o anga sing·doataniko dakenga,” ine Marak parakataha.
First Appellate Authority ong·e, West Garo Hills a·jani Deputy Commissioner, sal 10-ni gisepon, talataniko on·na nanga aro PIO-ni kamko sandirokna nanga ineba Marak dabiangaha.
“Ia badi ka·ani chittiko anga, State Information Commission aro Central Information Commission-naba on·ataha” ine Marak parakataha.

