Tura, Nov 21, 2026: Garo Hills Deficit Skul Teachers’ and Employees’ Association (GHDSTEA) Deputy Chief Minister Preston Tynsong-ni skigiparangko kragija kattarangchi, ‘A·kinrang’ aro ‘Sogimin Biterang’ ine chonikaniko raken jegalataha.
Ian skigiparangko namemanchaan chonnikaha aro iako chinga ra·chakna man·teljawa ine GHDSTEA Sukrobar salo parakataha.
“Chinga skigiparang, an·tangtangni man·na nanggniko on·chinasa ku·rang on·e jingjengatenga aro ian Democracy-mi bewalo dabiani ong·a” iine skigiparang parakataha.
Bi·sarangna skie on·enggipa skigiparang iandake chonnikako man·na krajachim, batesa mande ra·ako man·na kraachim ine GHDSTEA, Sukrobar salo suk ong·gijaniko parakataha.
Ua a·dokni saksa Deputy Chief Minister ong·pile, skigiparangni kosako iandake kragija kattarangchi chonnike agangipa kattana kratcha·na nanga aro ua an·tangni namgijagipa kamna skigiparango kemako bi·na nangchongmota ine GHDSTEA dabiangaha.
“Skigiparang ‘A·kinrang aro Sogimin Biterang’ ong·ja. Chinga songsalko rikanio pangchakaniko on·giparangsa ong·a. Uni iandakgipa kattarangna chinga namen jagokmanpilaha aro aiao inmanpilaha” ine GHDSTEA parakataha.

