Shillong, Nov 18, 2026: Sombar salo ‘National Press Day (NPD)’-ko Shillong-o maniani salo a·dokni Skotong Minister Conrad K. Sangma, mongsonggipa sokgipa ong·e, Press-ni manderangna aganprakangengon, Notional Press Day-ko ong·atgipa SPC-ko mittelangan baksana, ua an·tangni nama sikaniko on·angenba, a·dokni Journalist aro Social Media-ni dingtanggrikaniko talatangaha. Ua Social Media-rango kobor-rangko on·gipa manderangoni Journalist-rangko dingtangatchina didiangaha.
Meghalaya a·dokni Journalist-rangko ma·sina gita, dingtangmancha Journalist-rangni bimingrangko tarichina, Skotong Minister Shillong Press Club (SPC) aro Meghalaya Editors & Publisher Association (MEPA)-ni dilgiparangko didiangaha.
Sorkarini ra·chakako ba Certify ka·ako man·gipa Journalist-rang aro Social Media-rango kobor on·giparangni gisepo dingtanganiko ra·bana man·na gita, Press-ni manderangna skie on·ani program-rangko ong·atchina gitaba Skotong Minister ku·pattiangaha.
Social Media-rango kobor on·gipa manderang, bang·bata somoion, obostarangko talchenggija, saksa sakgipinrangni kosako ba sorkarini kosako ong·gija kobor-rangko gipate, a·doko so·sojengjeng ong·atronga. Uni gimin, kakketgipa kobor-rangko on·na man·na gota, Journalist-rangna dingtangmancha skie on·anirangko dakchina Sangma didiangaha.
Indake ong·genchimoba, Skotong Minister, Shillong Press Club (SPC)-ni Social Media Account-rang jedake Instagram, Facebook aro Youtube-rangko a·bachengate, on·angaha. Ua pangnan Social Media-rango kakket ong·gijagipa kobor-rangko sorkarini kosako ba saksa sakgipin-ni kosako tol·e matnanganirangko nikronga ine Skotong Minister parakangaha.
A·dokni Journalist-rangna dingtang dingtang nanganirangko DIPR-ni ning·o chu·sokate on·na gita, sorkari raken kamko ka·enga ineba Skotong Minister aganaha.
Press ba Media-ni bidingo talatangengon, nama bewalo sorkariko matnanganiara sorkariko gisik saata ong·ja, indiba kobor ra·timgiparangni kamrangko namdapatna dakchakanisa ong·a. Ua an·tangba Mediani nama bewalo matnanganichi kamrangko namdapatna man·a ine Skotong Minister aganangaha.
Sorkarini dongimin, niamrango pangchake, nama bewalo kakket ong·gipa kobor-rangko see parakchina, skie on·ani program-rangko ong·ate, Media-ni kamrangko Garo Hills-o namdapatna, man·na gita, Garo Hills-ni Journalist-rang, re·anggipa 2025 bilsini April 11 tariko ‘Garo Hills Press Club (GHPC)’-ko bikotaha.
Garo Hills-o Press Club (GHPC)-ko bikote, Shillong Press Club (SPC)-ni dilgiparang baksa bakrime, DIPR-ni ning·o journalist-rangna sorkarini dakchakaniko man·pana, GHPC jotton ka·enga.
Unbaksana, Skotong Minister, je Social Media Account-rangkon, Shillong Press Club-na a·bachengate on·angahachim, apsandaken, Garo Hills-oba Social Media Account-rangko a·bachengate on·china sorkariko mol·molanggen.

