Shillong, Nov 16, 2026: Bilsianti manironga gitan ia bilsioba, November 16 tarik Sombar salo, “Journalism Populist or Responsibility” ine ‘Katta Bichong’-ko done, National Press Day (NPD)-ko Shillong Club-o
maniangaha.
Ia program-ko Shillong Press Club (SPC) aro Information and Public Relations (IPR) bakrime ong·ataha. Ia program-ona a·dokni Skotong Minister Conrad K.Sangma mongsonggipa sokgipa ong·e bak ra·angaha. Unbaksana Information Public Relations (IPR)-ni Minister In-charge Lhakmen Rymbui, Directorate Information Public Relations (DIPR)-ni Director Shivansh Awasthi, Deputy Director F.K Marak, Shillong Press Club-ni dilgiparang, Meghalaya Editors & Publisher Association (MEPA)-ni dilgiparang aro bang·a kobor setimgiparang, kobor ra·timgiparang re·bae bak ra·angtokaha.
Ia program-ona Garo Hills Press Club (GHPC)-ni dilgiparangba, SPC-ni okamatako man·e bak ra·angpaaha. Indake ia National Press Day-ko maniani salo, Shillong Press Club-ni Social Media Account (SMA)-rang jekai Instagram, Facebook aro Youtube-ko Skotong Minister a·bachengate on·angaha.
Program matchotani ja·mano Shillong-ni dokna dam·anio mingsinggipa Colours Band git ring·e, Mediani manderangko an·saoatangaha.

