Tura, Nov 14, 2026: Sukrobar salo, Dama Bol 1000-ko doke Wangalani gittamgipa salo, Meghalaya a·dokni Governor C.H. Vijayashankar, mongsonggipa sokgipa ong·e bak ra·angaha. Ua A·chikrangni daka rikanirangko name ripingangkuna gong lak bonga tangkarangko, Hundred Drums Wangala Festival Committee (HDWFC)-na on·angaha.

Ia Wangalani gittamgipa salo, a·dokni Governor baksa Meghalaya Legislative Assembly-ni Speaker Thomas A Sangma, Cabinet Minister Brening A Sangma, West Garo Hills a·jani Deputy Commissioner Vibhor Aggarwal aro dingtang dingtang dilgiparang aro official-rang dongpae bak ra·angaha.

Indake Wangalani gittamgipa salo, Rev Donaldwood R Marak-ni ku·rangchi Isolo bi·e wangalaniko a·bachengataha. Uandake, maniaona sokbagipa manderangna Memento-rangko on·ani ja·man, Saka Choir-ni dilanichi, ‘Dimdim Dimchong Dadichong’ gitko jinma ring·aha.

Ia Wangalanio, Assembly-ni Speaker Thomas A Sangma jinmana aganprakengon, Dama Bol 100-ko doke Wangalani bidingo agan-talatangengon, ia manianiko dama bol 50-ko doke Wangalani ja·man, da·o dama bol 1000-ko doke Wangalaona sokaha, ine aganangaha.

Ia bilsi dama bol 1000-ko doke Golden Jubilee-ko maniao, Meghalaya a·dokni Governor CH Vijayashankar, jinmana aganprakangengon, Meghalaya a·dokko man·anichi namroro silroroaniko man·china Garo Hills-o pagitcham ma·gitchamrang on·gilangaha aro ian A·chik Matgrikrangni a·song ong·a ine aganaha.

Ian skanggipa, ‘Angni Garo Hills-ona re·baani ong·a, A·chikrangni dal·batgipa maniani Wangala Festival-o dama bol 1000-ko doke Golden Jubilee maniako nike namen kusi ong·a. Mikkangchiba dama bol 1000-na bate bol 2000 damarangko doke wangalna nanga” ine aganangaha.

Indake Wangalani gittamgipa salo, ‘Chachat So·e’ maniani ja·mano, Chachat Nokoni ong·kate, kamalko sa·ra rodile jinma chroke mesokangaha.

Uni ja·mano, South West Khasi Hills, Ranikor-oni re·bagipa Bolabeta Cultural Artists Society, a·songna ring·mittelangaha aro Bi·sarangni Wangalgipa dol chroke mesokangaha. .