Tura, Nov 11, 2026:Ia bilsi Dama Bol 100-ko doke Wangalani bilsi 50 gapaniko ba Golden Jubilee-ko maniani bak gita, ia chango Dama Bol 1000-ko doke Wangalaniko Butbar salo a·bachengataha aro ia wangalaniko November 11 tarikoni 14 tarikona sakbri joljol Chibragre Wangala A·damo manianggen.

Ia Wangalaniko a·bachengatani salo Meghalaya a·dokni Skotong Minister Conrad K Sangma, mongsonggipa sokgipa ong·e bak ra·angaha aro unbaksana Gambegre-ni MLA Dr. Mehtab Chandee A.Sangma aro gipin dilgiparang, official-rangba dongpae bak ra·angpaaha.

Ia Wangalaniko, A·chik pagitchamrangni dakronga gita, ‘Chandal Goe’, a·bachengataha. Uni ja·mano, Wangalani ‘CHIRONGDIK’ Souvenir ba Magazine-ko oprake on·angaha. Indake Wangalaniko a·bachengatna gita, Harding Theological College (HTC)-ni Principal Dr. Imnanungshi Imsong-ni ku·rangchi Isolo bi·angaha.

Uandake,Wangalaniko a·bachengatanio, ‘Dimdim Dimchong Dadichong’ gitko jinma ring·aha aro ia gitko segipa, Millickson K Marak sagini ma·drangrang ring·dilangaha.

Indake Wangalaona re·bagipa manderangko Hundred Drums Wangala Festival Committee (HDWFC)-ni Chairman Ronald Rikman Ch. Sangma rimchaksoani kattarangko aganangaha. Uni ja·mano Dama Bol 100-ko doke Wangalaniko a·bachengdilgipa gitcham member-rangna mande ra·pilskaaniko dakangaha.

Ia Wangalaniko a·bachengatanio, Karbi Anglong-oni Wangalgipa dol, chroke mesokangaha.

Ia Dama Bol 100-ko doke Wangalani bilsi 50 gapaniko ba Golden Jubilee-ko manianio, dama bol 1000-ko doke Wangalaniko a·bachengataha.

Ia Wangalani skanggipa salo, Skotong Minister Handloom & Handicrafts Exhibition-koba oprake on·angjolaha.