Gasuapara, Nov 9, 2026: Chokpot constituency-o ga·akgipa Gasuapara Block-ni ning·o donggipa Ginneng Kolsigre Songgital
British-ni chasongonin da·alona bijoli gri dongna nangenga ine u·iataha.

Ua songni samtangtango donggipa gipin songrango bijoli man·genchimoba, Ginneng-Kolsigre Songgital-nade da·onaba, Chokpot MePDCL office-oni maming nirok simsakatani dongkuja.

“Chinga changni chang Chokpot MePDCL office-na lekkarangko on·ahachim aro apsandaken, Chokpot-ni MLA Sengchim N.Sangma aro Rongrikkimgre GDC-ni MDC Nikman Ch. Marak-na neng·nikanirangko janape dakchakaniko on·pachina mol·molahachim. Indiba da·alona maming dakchakaniko on·jaha” ine songni manderang suk ong·gijaniko parakataha.

Ginneng-Kolsigre Songgital-o bijoli gri janggi tangani a·sel, poraigipa bi·sarang, VEC-ni President Secretary-rang, salanti report-rangko bloc-rangona watatna, ASHA Worker-rang report-rangko watna man·jae bang·a neng·nikanirangko chagrongna nangenga.Unbaksana ringani chirangko saldona man·jae bilongen ringani china neng·nike janggi tangna nangenga, ineba parakataha.

Songni manderang ru·uta salrangonin bijoli sringe ba sale on·china dabienga, da·alonaba bijoliko on·kuja. Uni gimin, jena kingking bijoliko sale ba sringe on·kuja, mikkangchiba dabianiko dontongkujawa ine Ginneng-Kolsigre Songgital-ni Nokma Nangan Ch.Sangma parakataha.

Iandake neng·nikaniko chagronge janggi tangengon, gipin songni manderang gita apsan gadango janggi tangpana man·na gita bijoliko sokate on·pachina, Chokpot MePDCL office aro Dalu MePDCL office-ni SDO aro officer-rangko songni manderang mol·molataha.