Chiading, Nov 9, 2026: East Garo Hills a·jani Chiading-o donggipa GASA, English Medium Skul (GEMS)-ni bilsi 15 gapani, Crystal Jubilee aro Annual Skul Function Day-ko maniani salo warachakgipa dolni dilgipa aro Songsak-ni MLA Dr. Mukul M. Sangma mongsonggipa sokgipa ong·e, bak ra·angaha aro unbaksa TMC dolni chadamberangko dilgipa Dr. Saljagringrang R. Marak-ba dongpaaha.

“Chengo A·chik A·songni ma·a paa-rang, mama adarang a·doktangni skia man·chenggipa saniba depante demechikrangona re·ange, na·an skia man·chenggipa songo noko an·chingba skul kulina, an·chingni dedrangba gipin jatrang gita mikgaogiparang ong·china, skia man·gipa niksenggiparang ong·china, seng·gipa sapgipa dedrangko a·doktango tarina inesa ma·a paa-rang ku·mongtoka. Uni ja·man skia man·gipa chadamberang an·tangtangko on·kange skul kulia, ian skigiparangni jatna kakket ong·e, tangka paisa gri dangdike on·ani ong·a. Ian aiao inmanpilgipa skigiparangni kam ong·a” ine Dr. Sangma aganaha.

“Bi·sarang chonmitingo ma·gipa sepango dongjaode grapa, indiba bi·sarang dal·jokode, ma·giparang grapskagen, chel·achi bi·sarang poraina re·angode, ma·gipa dedrangko Krismas cha·na okamaton, songtangona re·bana gongjaha. Uni gimin sambaon skul dongode, ma·a paa-rang chel·achi watatna nangja, chel·achi re·angoba, mittamrang basakobade bon·chongdike re·bapilgiparang gnang” ine Dr. Sangma aganaha.

Da·ororo poraiani ki·taprango seanirangko nikon chu·onggijaniko bang·en nika. MBOSE-o da·ode NCERT-ni ki·tapko aro CBSE-ni course-ko poraigiparang baksa susana man·jaenga. MBOSE-ara an·ching Meghalaya-ni, CBSE course-na bate MBOSE-ni course-ko chua gadangona sokatna sawa champengenga ine Dr. Sangma sing·doangaha.

MBOSE-ko chugipa gadango kam ka·na gitan dingtang dingtang sak 5 Directorate-rangko songaha, Finance aro Academy dingtang office-ona re·ange nibo, da·ode gipinni ki·tap seako ra·e postal department gitalsa MBOSE-o kam ka·skaengaha, ua aganangaha.

GEMS-ni Crystal Jubilee-ko maniani salo ma·a paa-rang bang·en bak ra·aniko nike, Dr. Sangma, mingsa cholko ra·e, salantio cha·enggipa me·su samjakrangni bitchilrang gimaanganiko nike agriculture aro horticulture-ni sualgipa hybrid bitchilrangko ge·jachina mikkrakatangaha.

Agriculture aro Horticulture-ni sualgipa hybrid bitchilrangko ge·ani ja·man bitchilrangko ge·taiode chaja, unode company-rangni tepe palgipa bitchilkon brena nangtelgnok. Ambinno badiaba A·songko an·tangni ning·o done, bitchilrangko on·atjaode, okgimu chakna nangen.
Uni gimin a·doktangni bitchilrangko gamchate ra·na nanga, ine ge·e game cha·giparangko Dr. Sangma mikkrakataha.