Tura, Nov 2, 2026: Batanggipa 2014 bilsio A·chik National Volunteers Council (ANVC) aro ANVC-B dol baksa songgigrike soi ka·grikaoni da·o bilsi 12 ong·piloba, songgigrikanio ku·rachakgiminko chu·sokatkujaenga, ine Bharatiya Janata Party (BJP)-ni State Vice President aro Tura-ni MDC Bernard N Marak matnangataha.

Ini bidingo nirokatchina, Union Home Minister Amit Shah-ko disiatenba, a·dokni Chief Secretary gita, sedoataha. Batanggipa 2014 bilsini September 24 tariko ANVC aro ANVC-B dol baksa songgigrikaniko nipilchina ta·raken, Central aro State Level Monitoring Committee-ni tom·aniko ong·atchina Marak didiataha.

Tura MDC-ni parakatani gitade. tom·tomaniko dake, namroro silroroaniko ta·rakbatatna aro Garo Hills Autonomous District Council (GHADC)-na bilrangko on·dapna gita, 2014 bilsio India sorkari, Meghalaya sorkari aro ANVC aro ANVC-B dol songgigrikanio soi ka·grikaha.Ia songgigrikanio ku·rachakgimin kamrang bang·batakon chu·sokatkujaenga. Uni gimin ia songgigrikanio soi ka·grikani miksonganiko pe·ani ong·enga, ineba BJP-ni State Vice President matnangataha.

Songgigrikani Paragraph 12.1-o janapgimin kattarangko gisik ra·atpile, Home Affairs Ministry-ni Joint Secretary (NE)-ni dilanichi, Central Monitoring Committee, jadokprakon ia songgigrikaniko ja·rikama ja·rikja, uko nipilani ong·achim aro ia committee-o Meghalaya sorkari, District Council aro ANVC aro ANVC-B-ni member-rangba bak ong·pana nanga, ine Marak parakataha.

Ia Committee, batanggimin bilsi 6-ni gisepo changsaba tom·aniko ong·ata dongkuja, ine parakatenba ia Committee-ni tom·aniko ta·raken, Tura-o ong·atchina aro dongimin niamrangko nirokchina Tura-ni MDC didiataha.

State Level-o Meghalaya sorkari, re·anggipa 2025 bilsini September 26 tariko, Shillong-o tom·aniko ong·atangenba, ANVC aro ANVC-B dolrang baksa songgigrikaniko ta·rake chu·sokatna jagniprakon tolm·aniko ong·atgen ine ku·rachakahachim, indiba ia tom·aniko ong·ataoni da·o bilsisa batpilengahani gimin, changni chang gisik ra·atpilaniko on·ahaoba, tom·aniko ong·attaia dongkuja. Re·anghipa 2020 bilaio
COVID-19 sajinmana skang, tom·aniko ong·atanio, State Level Review Committee-o saksa member dake ra·na ku·rachakahachim, indiba da·alonan a·dok sorkari, ia ku·rachakaniko chu·sokatkujaenga ineba Marak matnangataha.

Ia songgigrikani Para 12.2-ni ning·o, Committee-ko songpiltaichina aro ku·rachakgiminko chu·gimik chu·sokatkuja dipet jagniprakon Tura-o tom·aniko ong·atchina, BJP-ni State Vice President didiataha.

Garo Hills Autonomous District Council (GHADC)-ko bilakbatatna gita dingtang dingtang department-rang jekai, Public Works Department, Public Health Engineering Department, Agriculture, Irrigation, Fisheries, Tourism, Arts & Culture, Registration of Births and Deaths, aro Rural & Urban Affairs-ko pakwatna songgigrikani gimin, Marak gisik ra·atpilaniko on·angaha.

Una agreba, Garo Hills-o Medical College-cum-Hospital, Nursing Skul, Paramedical Institute, Women & Children Hospital-ko kulina songgigrikani gimin Tura MDC, gisik ra·atpilaniko on·ataha.