Williamnagar, Oct 31, 2026: Garo Hills-o Lokayukta Bench-ko a·bachengatchina dabie, Garo Hills Youth Solidarity (GHYS), H.Q Simsanggre, Skotong Minister Conrad K Sangma-na see on·angaha.

Garo Hills-o Lokayukta Bench dongjani a·sel, neng·nikanirangko chagrongna nangenga, jedake da·alo Garo Hills-ni manderang maiba sorkarini kam ba scheme-rangko cha·bokani ba tik ong·gijanirangko Lokayukta-o badi ka·ani ja·mano hearing-na Shillong re·angna nangenga ine GHYS-ni seatgipa chittio janapaha.

Ian songni manderangna aro kangal nokdango janggi tangenggipa manderangna tangka paisani gita namen neng·nikani ong·a. Shillong re·rurana, hotel para ra·na aro cha·a ringani korosna, bang·a tangkarangko galna nanga. Unbaksana hearing re·taitaina neng·nikani ong·a ine GHYS janapangaha.

Iandakgipa neng·nikatanirang, kakketgija cha·bok rusiani gimin, badi ka·na sikani donggenchimoba, ramram manderangko ja·donggaata. Jal Jeevan Mission (JJM)-ni kamrangko name ka·jani gimin, GHYS-ni Meghalaya Lokayukta-o minggittam badi ka·anirang donga aro mingsa BADO Scheme-ni Rongara bajar sepango Hanging Bridge-ni gimin, Lokayukta-o badi ka·aha uarang da·onan bon·chipenga ineba GHYS aganaha.

Lokayukta-o badi ka·gipa Garo Hills-ni manderang, hearing-na Shillong re·angna nangtelna nangaia, maina Meghalaya Lokayukta Shillong-osa dongani gimin, uno video conference ba hearing-ko video conference gita kam ka·na chu·ongja. Video conference gita hearing-ko dakna man·genchimode, Garo Hills-ni badi ka·giparang Shillong re·angna nanggijan a·jatangon hearing-o bak ra·na gita man·aigenchim, ineba GHYS-ni chittio janpaha.

Garo Hills-o Lokayukta Bench donggenchimode, bang·a namgnirangko man·genchim. Garo Hills-o songdonggipa manderang tangka paisa aro somoi bon·e, Shillong re·na nangajawachim. Sorkarini scheme aro jinmani tangkarangko jakkalsretanina badi ka·na ka·dongbatgenchim aro hearing-na neng·nikani komigenchim, ine chittio janapaha.

Uni gimin manderangni neng·nikanirangko olgrokatna man·na gita, Meghalaya Lokayukta Bench-ko Garo Hills-o donchina GHYS, Skotong Minister-ko didiaha.