Tura, May 19, 2025: India aro Pakistan a·song damgnini gisepo dakgrikanio, India a·songna chel·chakgipa Indian Army, Indian Airforce, Indian Navy-rang an·tangtangni janggiko on·kange janggi galgipa sipairangna mande ra·pilskaaniko dakna gita, Tura Te·teng a·jao donggipa TMC, Office-o gitcham Skotong Minister aro warachakenggipa dolni dilgipa Dr. Mukul M.Sangma-ni dilachi Sonibar salo, TMC chadamberangko dilgipa Richard M Marak, Dr. Saljagringrang R Marak aro uamangni ka·rimskarang baksa mombatirangko so·e mande ra·aniko dakangaha.
A·songni manderangna janggitangko on·kanggipa, Indian sipairang ka·dongbee bobilko warachakenba amatahani gimin, uamangko mande ra·na kraa. India a·song namen bilakgipa a·song onga, India a·song bilakbatsranggipa (supper power) a·song ong·pajaoba, bilakgipa a·songrangoni damsa ong·paenga. India a·song bilak wa·sagipa a·song ong·a. India a·songni dal·roroaniko agangenchimode, gimikni gitan dal·roroenga, ine Songsak-ni MLA aro TMC dilgipa Dr. Sangma aganaha.
Da·alo sakantian, a·gilsakko ong·enggipa obostarangko nikenga, a·gilsak gimikni manderang tom·tome a·songska, jat gipinska baksa mande ra·grike, tom·tomao aro ka·sagrikao meli nangrimgrike dongna, a·dokna chigana, a·gilsak gimikna bi·chakaniko dakenga, ineba Dr Sangma aganaha.
“An·ching jegita tom·tomaniko man·na sikoba, an·chingo bobilrang dongani a·sel tom·tomaniko man·ja. An·ching nikna man·a, da·alo a·gilsak gimiko bilakgipa dingtang dingtang a·songrang gnang, bil gnange a·songtangko sason ka·na gita dongimin niam ki·tap a·song ge·antion donga, uano pangchake sason ka·giparang donga, indiba mitam a·songrangde, sason ka·giparangni kakket ong·jani a·sel, chu·sokgijaniko nikna man·a. Uni gimin an·chingni sepango dongipa a·songrangoni Pakistan a·songko sason ka·giparang an·tangni mikbokatangko chu·sokatna corruption-o engage ong·a, unode a·song ong·sia. Uni gimin Pakistan-o ong·engipa obostarang, ‘chaos and disorder and civil unrest almost everywhere’ an·ching uko mijaonin nikengaha, sason ka·anio chu·sokgijaniko donnuna dingtangmancha, ramarangko ra·gipa politician-rang, authority-rang ja·ku de·enga, ua apsankon Pakistan dakenga. uamangni chu·sokgijaniko donnuna manderangni nikanio aro golpoanio uamangni chu·sokgijaniko golpogija, dingtang golpoko ka·na ine Pahalgam-o bobil dolrang chadrapaniko dakaha. Jensalo Pakistan, India a·songko chadrapaha, unon India a·songba dongimin niamrango pangchake chadrapskaha” ine TMC dilgipa aganaha.
Uni gisepon, Indiako naljokatna dongimin Indian Army, Indian Navy, Indian Air Force-rang aro pilak sason ka·giparangni jangilo donge dilgiparang pilakan apsan ku·mongaha. Ia somoio a·songo songdonggipa sakantini ku·mongani somoi ong·aha, uni gimin da·alo ia dal·begipa India a·songo songdonggiparang ong·e, “Chinga defence forces-rangni me·a aro me·chikrang an·tangtangni janggiko on·kangahani gimin uamangna mande ra·pilskaaniko mesokna” “Solidarity March”-ko ong·atenga, ineba Dr. Sangma aganaha.
“Uni gimin an·ching inchrogen, sakantian India a·songni ra·bianiko chagrongmitting somoio an·ching sakantian apsan ku·monge bi·anio aro gisikni gita apsan ong·aniko mesokna nangenga. Uni giminsa da·alo an·ching ia Solidarity March-ko ong·atenga” ineba ua aganaha.
India a·songko chel·chakgipa Indian Army, Indian Air Force, Indian Navy-rang tangbangchina ine jinma inchroe, William Point-oni Te·teng A·ja TMC office-ona re·jomangaha.
