Gasuapara, Oct 30, 2026: South Garo Hills a·jani Gandibor songoniko cha·una re·bagipa Bangladesh-ni
mande saksako songni manderang rim·enba, October 29 tarik Bristibar salo Gasuapara Pulisna pakwataha.

Koborna u·iatani gitade, ma·sina man·gijagipa Bangladesh-oni cha·una re·bagipa manderang sriksrik India-ona, Minenggre song gita napbaaha ine rim·a man·gipa mande songni manderangna ku·rachakaha.

Cha·una re·bagipa manderang badita sakrang gnangchim, uarangoni saksa brangrikaha.
Re·anggipa October-ni 3 tarikoba, Gandibor songoniko dakait dakna re·bagipa manderangko rikenba, saksako man·rikaha aro ua mandekoba, songni manderang badi ka·enba, Gasuapara Pulis-na pakwatataha.

Apsan daken, October-ni 3 tarikon Border Security Force (BSF), 50 Bn aro 100 Bn BSF, Gasuapara Border Out Post-na badi ka·ani lekkako on·aha aro India- Bangladesh sima arirangko name nirokchina didiangaha.

Indake ong·genchimoba, da·alonan Bangladesh-oni sriksrik cha·una aro dakait dakna re·bagiparangko chu·gimik champengna man·jaengani gimin, songni manderang suk ong·gijaniko parakatenba, uamangni kenchipchipe janggi tanganiko janapataha.

Batanggimin jarangonin, uamangni songoniko bang·a jila kaanirang aro motor bike-rangko cha·ue katangrongani gimin neng·nikaniko chagrongna nangenga. Uni gimin, chel·chakgipa dolrangko name dake nirok sandianiko dakchina songni manderang mol·molataha.Indiba naljokataniko on·na man·janiara, India a·songni ning·on tom·tome janggi tangna man·gijaniko mesokani ong·a ine songni manderang parakataha.

South Garo Hills a·jani bang·a sima ari jolrangon, indake so·sojengjeng ong·anirang batroroenga aro kenchipchipanirang gapenga. Uandaken, Gasuapara jolrangoba bilsiantian iandakgipa a·selrangko chagrongna nangenga ineba parakataha.

Uni gimin ia neng·nikanirangko a·dok sorkari ta·rake namatna kamrangko ka·genchimode, namgenchim ine songni manderang parakataha.