Tura, Oct 25, 2026: West Garo Hills a·jani Rongram C&RD Block-ni ning·o donggipa Gondenggre songo bilsianti manironga gitan, ia bilsioba October-ni 23 aro 24 tarikrango salgni Wangalangaha. Indake, skanggipa salo ‘Rugala’ gnigipa salo ‘Sasat So·a’ aro Sa·ra Roa.

Ia Wangalaniko Nokmani sa·rao manironga. Ia A·chik jatni dakbewalko ripingna gita bilsianti Gondenggre songo Wangalonga. Ian A·chik jatni mingsa gamchatgipa dakbewal ong·a. Skangni A·chik ma·gitcham pagitchamrang bebe ra·atango kim·kim ong·a aro dakbewaltangko gimaatgija namen ripinga. Apsan daken, Gondenggre songoba jatni dakbewalko namen ripingbaenga. Skangni chasongo A·chik ma·gitcham pagitchamrang a·briko a·ba o·e, game ge·e janggi tanga aro mi-misirangko jamo chipa.

A·chik ma·gitcham pagitchamrang a·ba o·na skang a·ba nia aro on·tisa o·pate, walo jumang nia. Uamangni a·ba o·pate jumang niani walo jumang namgijako nikode a·ba o·gija gala ine agana. Indiba jumang namako nikode, mite krite a·ba o·a. Uamang a·ba o·a matchote jasamangna wa·cheng rama, uni ja·mano a·ba so·a. A·ba so·ani salgipino, chu dikka cheke, chu ringe, A·galmaka. A·galmakani ja·manosa ma·manti bosturangko a·bao ge·a. Uandake uamang bilsigimik neng·bee, a·ba game man·gipa mi-misi, ta·ma-taring, akaru-gominda aro pilak a·bani bosturangko akman tetmano bilsini bon·angchibara, October ba November jarango wangalonga.

Wangalani miksongara, a·bao game ge·e man·gipa mi-misirangko Pattigipa Ra·rongipa, Mite, ‘Misi Saljong’-ko mittel mitchue, Sagal amaona, chong·motan sagal dal·gipaona kusi ong·bee watatpilani ong·a. Indake bilsigipino a·ba o·taiani somoisa, Pattigipa Ra·ronggipa, mite Misi Sajojong-ko okamdotaia ineba agana. Ia Wangalaniko A·chik Songsarek-rang bilsio changsa pattigipa ra·tongipako mittelpilskae, cha·e ringe, kusi ong·e, Nokmani sa·rao dama doke, adil sike,rang doke, bangsi sike, me·a me·chik, nomil pante chrok mesae manironga.

Ian A·chik jatni dal·batgipa dakbewal ong·a aro ia Wangalaniko Songsarekna agre darangba dakmalja ine agana. Indake ia bilsini Gondenggre songo Wangalani Sonibar salo tom·tome matchotangaha.