Dadenggre, Oct 23, 2026::West Garo Hills, a·jani Damal A·sim jolrango bang·a chadamberang poraianiko dontongani ba skul drop-out ong·anirang batroroengani gimin aro seng·gnang jik-se ra·ani bidingo Damal A·sim Deficit Higher Secondary Skulo mikgaoatani ba mikkrakatani program-ko ong·atangaha.

Uandakgipa obostarang songadam nokadamrango batroroengani gimin, Education Department-ni ning·o Dadenggre Block Resource Centre (BRC) aro Damal A·sim Higher Secondary Skul bakrime mikkrakatani program-ko ong·ataha.

West Garo Hills, a·jani Dadenggre-ni SSA Block Mission Coordinator Tengme M. Marak, Damal A·sim aro uni wilwila jolrango skul poraianiko dontonggipa chadamberang batroroaniara sengnang bia ka·ani ba jik-se ra·ani a·sel ong·enga aro skie ra·anirang namen tang·onenga aro tang·dona man·jaenga ine ua aganaha.

Uni gimin, jolo songdonggipa pilak ma·a-paarang, skigiparang, Nokma Sanirang aro songni nokni manderang apsan ku·monge agan ku·pattianiko on·china, Marak didiangaha.

Unbaksana skul napgija dongenggipa bi·sarangko skul nappiltaina didienba, nama ku·pattianiko on·genchimode, bi·sarang lekka poranio chu·sokna man·gen ineba Marak agandapangaha.

Bi·sarangko lekka poranio gisik nangbatatna gita doka dam·ani, kal·susaani aro uandakgipa dingtang dingtang cholrangko on·anichi bi·sarangni gisiko dingtangatna man·gen. Uni gimin bi·sarangna nama bewalo skie on·china gitaba Mission Coordinator didiangaha.

Una agreba jolni Nokma aro Skuni gitcham Headmaster P G. Momin program-o dongpae, songo noko ong·a obostarangni bidingo talatangenba, skul poraie bang·a chatro chatrirang chu·sokna man·aha, ine parakangenba, jolo bang·a lekka poraina man·giparang dongoba songni nokni palo an·tangtangko mesokna man·giparang komia ine aganangaha .

Uandake program-o ICDS, Medical Department, Damal A·sim Deficit Higher Secondary Skuni Headmaster aro gipinrang dongpae agan ku·pattianiko on·angtokaha.