Shillong, Oct 19, 2026: Meghalaya High Court-ni Advocate General (AG) Amit Kumar-ko da·onaba ra·galkujaengani gimin, uko ra·galchina dabie, a·dokni Ukilrang jingjengattaina tik ka·aha aro AG-ko mangrakbatatna a·dok sorkarini ra·gatgipa gital niamkoba jegale, kachario badi ka·doangaha.

Meghalaya Panel Advocate, (Empanelment & Engagement) Guidelines, 2026-ko ja·rikna gita September 16 tariko a·dok sorkarini ge·etaniko Ukilrang jegale, Shillong Bar Association (SBA) aro High Court of Meghalaya Bar Association (HCMBA), bakrime Kachario Public Interest Litigation (PIL) ka·doangaha.

“Meghalaya High Court-ni Advocate General-ko da·onaba ra·galkujaengani gimin, uko ta·rake ra·galchina dabie chinga jingjengattaina tom·e chanchirimaha aro Chinga Ukilrang pilakan jingjengattaina nangnikaniko parakangtokaha,” ine SBA-ni Assistant Secretary N Shyambor Singh Marpan u·iataha.

Tom·a matchotani ja·man, kobor ra·timgiparangna aganengon, Bar Association-ni Member-rang, re·anggipa September 2 tariko skanggipa a·dokni Deputy Chief Minister-ko gronge agangrikon, AG Amit Kumar, antignina kachario mikkang pa·jawa ine ku·rachakaha aro ia ku·rachakaniko chu·sokataha.

“Uni ja·mano chingko September 16 tariko a·dokni Chief Minister, an·tangni nokona okamate, iani bidingo niatna ku·rachakaha. Indake ua October 7 tarikona somoiko bi·ahani gimin, chinga uni bi·a gitan somoiko on·aha aro chingni kam dontonge jingjengatanikoba dontongatchengaha,” ine Marpan aganaha.

Indake ong·oba, AG ia songgigrikaniko pe·aha ine SBA matnangaha.

“Re·anggipa September 16 tarikni ja·man Amit Kumar, High Court-osan ong·aigija gipin kacharirangoba mikkang pa·kuaha aro Chief Minister-ni chingna ku·rachakaniko pe·aha. Uni gimin chinga September 30 tariko tom·aniko ong·ate, kam dontongatpiltaina tik ka·aha,” ine Marpan aganaha.

Indake ong·genchimoba, da·o Puja chuttini ja·man, Ukilrangni jingjengataniko jinmana parakatgen ine SBA-ni Assistant Secretary aganaha.