Tura, Oct 18, 2026:: Garo Hills-ni dingtang dingtang biaprango songdonggipa Hindu-rang, Koch-rang, Rabha-rang aro Hajongrangni dal·batgipa Durga Puja-ko manina a·bachengataha.

Indake bilsio changsa Durga Puja-ko manina gita, Hindu toromko manigipaeang ge 135 puja pandal-rangko Garo Hills-ni dingtang dingtang biaprango rikaha. Meghalaya a·dokni pilak biaprangon, Durga Puja-ko manina gita gimik ge 237 puja pandal-rangko rike manianggen, jeon 60 percent-de Garo Hills-o ong·a.

Garo Hills-ni Central Puja Committee (CPC), tom·tome pujako manina gita district authority baksa melie kamrangko ka·aha. Durga Puja-ko October 17 tarikonin dingtang dingtang program-rangko a·bachengataha. Tura-o West Garo Hills a·jani Deputy Commissioner Vibhor Agarwal, Saptami-ni program-o mongsonggipa sokgipa ong·e bakko ra·angaha.

Indake October-ni 19 ba 20 tarikrango a·dokni Skotong Minister Conrad K.Sangma-ba program-o bak ra·angnaba donga ine ka·dongsienga.

Tura-o ge 33 Puja pandal-rangko rikaha. West Garo Hills-o gimik ge 76 puja pandal-rangko rikaha. Puja Pandal-rangko nitoe light-rangchi decoration ka·aha, indake cultural program-rangko ong·atenga.

West Garo Hills-o CPC aro district authorities, pujani somoirango light tekanirangko, traffic management, rongtal-an·talani ba uandakgiparangko nirokenga. Uni gisepon, thermocol aro plastic jakkalanirangko champengataha.

Indiba Member Hostel jolrango aro District Maternity and Child Hospital bijangchirango Silent Zone-ko rakkichina ge·etaniko on·aha. Indake, October 17 tariko Tura Parade Ground-o Food Festival, Handicrafts Stall aro Cultural program-ko ong·atangaha.