Tura, Oct 14, 2026: Tura-ni Lok Sabha Congress MP Saleng A Sangma-ni agangipa video-ko taridape, Social Media ‘Facebook’-o giproroatahani gimin, ‘Shirley Irene’ minggipa bimingo Facebook Account-ko chalaienggipa manderangni kosako Tura-ni District Youth Congress (DYC) badi ka·doangaha.

Iani bidingo Tura-ni DYC President Rikrak M Sangma, West Garo Hills a·jani Superintendent of Pulis (SP)-na Sombar salo badi ka·doangaha. Uni badi ka·gipa chittio janapatani gitade, ua video-o, Tura-ni MP Saleng A Sangma-ni agangipa kattarangko tol·e taridapenba, manderangko dilsretna gita Social Media-o watpripraataha.Saleng-ni agangipa kattarangko tol·e taridapenba, Social Media-o wataniara manderangko dilsretasan ong·aigija, indiba Tura-ni MP-na namgijagipa bimingko man·ataniba ong·a ine DYC dilgipa matnangataha.

Tura MP-ni agangipa kattarangko tol·e taridapenba, Social Media-o watgipa Facebook Account-ara sakgipin mandeni Profile Picture ba noksakosa mesokachim. Uan sakgipinni noksako niamgri jakkalani gimin ua Account-ko jakkalenggipa mandeni bidingo tale sandirokchina DYC President didiataha.

“Ia Facebook Account-ko jakkalenggipa mandeni ong·gija dakaniko sakki gnang rim·na nanga aro sakgipinni bimingko nosto ka·na, an·tangni bimingko donnue, sakgipinni bimingo cha·boke niamrangko pe·ani ong·a. Uni gimin Bharatiya Nyaya Sanhita (BNS), 2023 aro Information Technology Act, 2000-o dongimin niamrango pangchake rakgipa sastirangko man·na nanga” ine Tura-ni DYC President, West Garo Hills a·jani SP-na badi ka·doanggipa chittio janapataha.