Tura, Oct 14, 2026: Garo Hills Autonomous District Council (GHADC) election-ko ong·atgija ja 6 ra·doenba, uni ja·man da·o changsatai ja 6-na ra·dotaianiara, A·chik jatni bilko ra·sekani ong·a, ine Garo Hills Independent Candidate Movement Forum (GHICMF), matnangataha.

GHADC-o Executive Committee (EC)-ko rikenggipa, MDC-rangni term ba sal somoirang batanggipa March jaon bon·ahachim, indiba Garo Hills-o adita so·sojengjeng ong·ani a·sel election-ko ong·atna man·jahani gimin, gitcham, EC-ko ra·gale, gital EC-ko songtaie, Governor-ni bil on·achi ja 6-na rikpiltaiaha. Uamang ja 6-na an·tangtangni term-ko ra·dona somoi bi·enba, A·chikrangna ja 6-ni gisepo SER, GCL aro gipin kamrangko chu·sokatgen ine ku·rachakaha.

Indiba gital EC, ja 6-ni gisepo SER aro GCL-ko chu·sokatna man·jaha aro da·o changsatai MDC-rangni term-ko ja 6 ra·dotaiaha ine Meghalaya sorkari re·anggipa antio parakataha.

India a·songo songdonggipa manderangna bilsi-5 prakon, an·tangtangni dilgiparangko seokchina gita, Election Commission of India (ECI) Election-rangko ong·atronga. Indake ong·genchimoba, Garo Hills Autonomous District Council (GHADC)-ni election-kode bilsi 5-o ong·atgija, bilsi 6-na ra·doaniara, India a·songni on·gimin bilko pe·ani ba chonnika gita chacha ong·aha ine GHICMF parakataha.

Uni gimin, “Chinga GHICMF, GHADC election-ko ong·atgija, EC-ko rikenggipa MDC-rang an·tangtangni term-ko ra·dorikrike donganiko ra·ken jegala aro re·baenggipa October 18 tarik ja·mano, EC-ko ra·galja ong·ode, chinga niam gita uamangni kosako raken ja·ku de·anggen,” ine GHICMF parakataha.