Tura, Oct 14, 2026: East Garo Hills a·jani saksa niksenggipa aro man·e cha·gipa, Pa Georgeman S. Marak aro uni nokdangni manderang, Tura Christian Hospital-na, 62.5 KVA Jakson Generator Set ge·sako jaksrambee on·gilatahani gimin, Tura Christian Hospital-ni Medical Superintendent (MS) Dr. Editha W. Momin, dingtangmancha mitelpilskaani kattarangko parakataha.

Dr. Momin-ni parakatani gitade, ia Generator Set-ara bijoli dongjani somoirango aro rang·gitik hospital-ni nangchongmotgipa kamrangko ka·na namen dakchakbeani ong·gnok. Bijolirang sichangani a·selan basakobade hospital-o sana bananiko ra·enggipa manderangna aro hospital-o dangdike on·enggipa doctor-rang aro nurse-rangna namen neng·nikbeani ong·engachim, indiba da·ode namen dakchakbeani ong·gnok.

Pa Marak aro uni nokdang,ni ma·dot Tura Christian Hospital-na dingtangmancha jaksrambee dakchakaniara, uamangni namgipa gun, manderangna ka·sachakani aro namgipa dakmesokani ong·a ine Dr. Momin an·tangni kusi ong·aniko parakataha.

Uamangni dakchakaniara hospital-o sana bananirangko nambatatna aro sagipa manderangna an·seng baljokaniko dangdike on·anio namen gamchatbegipa ong·a ine Dr. Momin, Pa Marak aro uni nokdangni manderangko de·mittelataha.