Shillong, Oct 13, 2026:: All Khasi Hills A·chik Joint Action Committee (AKHAJAC), South West Khasi Hills a·jani Puksora songo jinma tom·bimonganiko ong·atenba, Khasi aro Jaintia Hills a·jarango, District Selection Committee (DSC)-rangni dingtang dingtang kamrangna porikkarangko ra·anio A·chik chadamberang neng·nikanirangko chagrongna nangengani gimin chanchirimangaha.

Indake tom·a matchotani ja·man, AKHAJAC-ni President John D Sangma, kobor ra·timgiparangna aganengon, DSC-ni kamna ra·anio, Khasi-Jaintia Hills jolrango Khasi subject-ko aro Garo Hills-o Garo subject-ko nangtelgipa ong·atna ia 2026 bilsini January jao sorkari ge·etaniko on·ani a·sel Khasi aro Jaintia Hills a·jarango songdongenggipa A·chik chadamberang neng·nikanirangko chagrongenga ine parakatenba, ia niamko dingtangatchina sorkario dabiangaha.

“Khasi aro Garo ku·sik minggnian da·o Meghalaya a·dokni official language ine ra·gatako man·ahani gimin a·dokni pilak DSC porikkarangon, ia ku·sik minggnikon ra·na nanga,” ine Sangma aganaha.

Khasi aro Jaintia Hills a·jarango songdongenggipa A·chikrang da·o lak 4-na baten dongahani gimin ia jolrango songdongenggipa A·chikrangnaba apsan cholko on·pana nanga ine Sangma sorkariko didiataha.“Chinga Khasi Hills-on atchikape dal·giparang, Graduate ong·ani gimin chingni chadamberangara bachi re·angkugen? Sorkariko iako ma·sichakna nanga aro ia niamko dingtangatpilna nanga,” ine AKHAJAC-ni dilgipa dabiangaha.

AKHAJAC, A·chikrangni songdongenggipa Khasi Hills a·jani dingtang dingtang songrango, iandakgipa tom·anirangko ong·atangkugen ine parakatenba, MDA sorkarina mikrakataniko on·angaha.“Iade a·bachenganisan ong·kuenga aro sorkari chingni dabianirangko knachakja ong·ode, chinga chingni bilna bilakbate jingjengatangkugen,” ine ua aganaha.

Iana skangba AKHAJAC-ni tom·bimonganiko, re·anggipa jao, West Khasi Hills a·jani Malangkona songo ong·atangaha aro ia Puksora songo gnigipa changna Committee-ni tom·bimonganiko ong·ataha. Ia tom·bimonganio, Puksora jolrango donggipa dingtang dingtang A·chik songrangoni bang·bea manderang re·bae bak ra·angtokaha.