Tura, Oct 1, 2026: Chang 21-gipa ‘Memorial Prayer Service of 30th September Victims’, 2005-ko Victims Soliditary Forum (VSF), Butbar attamni 6 bajio Tura Chandmari Field-o maniangaha.

Ia Memorial Prayer Service of 30th September Victims-ona Tura-ni MDC Bernard N.Marak, GSU-ni gitcham President Andreas T. Sangma, GSU CEC-ni President Tengsak Momin, GSMC-ni Acting Chairman Balkarin Ch.Marak, Mondolini dilgiparang, dingtang dingtang dolni dilgiparang, Tura Music Academy-ni chatro chatrirang, Tura NEHU Campus-ni chatro chatrirang aro Tura-ni manderang dongpae bak ra·angatokaha.

Batanggipa 2005 bilsini September 30 tariko Tura aro Williamnagar-o dal·begipa a·sel ong·aha, jeon sak 9 A·chik Matgrikrang MNOSE-na dakgrike an·tangtangni janggiko on·chakahachim. Ia salara namen gisik ra·na krabegipa aro gualna man·gijagipa sal ong·a. Ua sal dipet, ia salko ‘Black Friday’ ba ‘Andalgipa Sukrobar Sal’ ine GSU biming donaha. Ia a·sel ong·ani ja·pangara Meghalaya Board of School Education (MBOSE), Head Office-ko Shillong-chi ra·jitangna am·ani gimin, GSU-ni dilanichi dingtang dingtang NGO-rang, Tura aro uni wilwilao songdonggipa manderang Tura Chandmari Field-o tom·bimonganiko ong·ate, jinma re·jomaniko dakna tom·dakmitting somoio rang·gitik pulisrangni silai goanichi, guli nangako man·e, Tura-o sakbri aro Williamnagar-o sakbonga manderang janggi galaha.

Indake sianggipa A·chik Matgrikrangko gisik ra·na gita, bilsianti September 30 tariko ‘Memorial Prayer Service of 30th September Victims’,-ko VSF Tura-o manirongenga.

MBOSE-na janggitangko on·chakgipa A·chik Matgrikrangko gisik ra·engon, bilsianti dakrongbaenga gita, dukko ga·akgipa nokdangni manderangna, guli nangako man·e saknagipa manderangna aro sianggipa A·chik Matgrikrangni janggina dingtang dingtang Mondolini dilgiparang, Pamongrang, Revrend-rang bi·chakaniko dakangaha aro sianggipa Matgrikrangko mande ra·e, uamangni bimingrangko see donenggipa Senotaph-ni sambao nitogipa pulni bibalrangko done, mombatirangko so·e, gisik ra·aniko dakangaha.

Uandake, ia chang 21-gipa Memorial Prayer Service of 30th September Victims-ko manirngon, dingtangmancha, sianggipa nokdangni manderangna, NGO-ni dilgiparangna aro September 30 tariko git tarie ring·gipa Ma Lasmuni C.Marak, Pa Chonu Marak aro Pa Markush D.Shira-na Tura Talent Hunt, medal aro momentos-rangko suale on·angaha.

Indake bon·kamao ia program-ko chu·sokatna gita dakchakgipa dingtang dingtang dolni manderangko VSF-ni Secretary Wilver Graham M.Danggo mittelpilangskaha.