Chokpot, Sep 28, 2026: Rongrikkimgre GHADC constituency-o susana tarienggipa Independent candidate, Clinton R.Marak, Sonibar salo South Garo Hills a·jani Chokpot jolo bijoli dongkugijagipa songrangko re·ange niangaha.

Uni parakatani gitade, re·anggipa July-ni 15 tariko ua, bijoli dongkugijagipa songrangni gimin, ma·sina gita Chokpot MePDCL office-o, RTI ka·aha. Chokpot MePDCL-ni ning·o badita songrang bijoli man·kugijagiparang dongachim aro maini gimin ua songrango da·alonaba bijoliko watkujaenga, information-ko bi·aha.

Indiba Chokpot MePDCL office-ni RTI-na aganchakani gitade, office-o ua songrang list-o dongja aro maming information-rangko man·ja ine report-ko on·aha.

Uni gimin, dingtangmancha Waro-Songgitcham songona re·ange songni Nokma aro songni manderangko gronge, uamangni songo bijoli gri dongani gimin, sing·sandianiko dakaha. Nokmani talatani gitade, Teksagre jolo komibeoba dam 11 songrang da·onaba bijoli gri dongenga ine aganaha. Ua songrangara Minchi-Chiringgre, Kama Minchi Chiringgre, Rongbinggre, Waro-Songgitcham, Sangma-Matchokgre, Daji-A·dugre, Daji-Boldakgre, Daji-Rongkuakgre, Buga-Kolgre, Chisrenggre aro Waro-Songgital, ong·a.

Uamang ru·uta bilsirangonin bijolina Chokpot MePDCL office-o lekkarangko on·ahachim, indiba maming aganchakniko dakjaha aro bijolikoba on·jaha ine Nokma aganataha.Uamangko batanggimin bilsirango pilni pil re·ange sing·sandioba, Dadenggre aro Dalu MePDCL office-chi re·ange aganchina watatrongachim.

Uni gisepon, RTI-na aganchakani gitaba, maming information dongja aro record rangba dongja ine chittio janapataniara kakket ong·ja ine u·ina gita man·aha.

Ia neng·nikani bidingo a·dokni Power Minister Metbah Lyngdoh-na chittirangko seataha aro apsan daken mobile phone-rang gita, MePDCL-ni “Director of Power Distribution Officer-na aro Chief Engineer Distribution West Range Incharge MePDCL Tura” naba chittirangko watataha.

Bijoli man·kugijagipa songrango donggipa mamderangni talatani gitade, uamangni neng·nikaniko darangba nirokata dongjani gimin, uamang an·tangtangsa solar panel-rangko bree jakkalenga, indiba mikka wakariode, sal dongjae, songantian andalalo dongna gita nangenga ineba parakataha.

Indake ong·engon, India a·songni jakkgitel ong·aoni da·o bilsi 80 mang gapengahaoba, Chokpot MePDCL-ni ning·o bang·a songrangan bijoli gri janggi tangna gita nangengachim aro uan dake bijoli gri ong·achi uamangni dedrang lekka porani, seng·a sapaniko skie ra·ani, songsal baksa agan golpogrikna man·ani, a·gilsako ong·enggipa obostarangko u·ie ra·ani aro samra sampilanio pilakni gitan neng·nikaniko man·engachim, maina ia chasongo technology-chisa pilak kamkon ka·ani gimin, bijoli gride mamingkon dakna man·jaha.

Uni gimin, a·dok sorkariko chalaienggipa skotong Minister Conrad K. Sangma aro Power Minister Metbah Lyngdoh aro MePDCL department-ni dal·dalgipa matbolrangko, Marak mol·molataha.

Meghalaya a·doko dal·begipa Hydro Power Station-rang gnang jekai Barapani aro Ganol Hydro Power Station aro ia dal·begipa Hydro Power Station-rang, Meghalaya a·doko donggipa pilak songnan bijoliko watoba gitchapilgenchim.

Uni gimin bijoli gri dongenggipa songrangna ta·rake bijoliko on·pagenchimode nambegenchim, maina bijoliko man·aniara mandeni nangchongmotgipa bak ong·a. India a·songni niam bidikni Article 21-o pangchake, India a·songni dingtang dingtang High Court-rangon raiko on·manaha, ine Marak parakataha.