Tura, Sep 28, 2026: September 28 tarikoni September 30 tarikona India a·songni pilak biaprangon, bank-rang strike ka·engani gimin, manderang an·tangtangni nanga kamrangko ka·na man·na gita, September 27 tarik Robibar salo, dingtang dingtang bank-rangko kulichina, Reserved Bank of India (RBI) ge·etaniko on·ahani gimin, Garo Hills-ni dingtang dingtang Civil Society Organisation (CSO)-rang, ma·mong sorkarini kosako jegale, Garo Hills-o bank-rangko kulina on·gija chipattokaha.

Meghalaya a·doko songdongenggipa manderang bang·batan Kristianrangsa ong·ani gimin, Robibar salara Kristianrangni olakkiani salsa ong·a, ine Garo Hills-ni dingtang dingtang NGO-rang, bank-rangko kulina on·gija chipattokaha.

Garo Hills-ni dingtang dingtang NGO-rang, jekai AAYF, ADE, AYWO, FAF, FKJGP, GSU aro AAYWS Robibar salo Garo Hills-ni dingtang dingtang bank-rangona re·ange, kam ka·na on·gija champengataha.

Indake Meghalaya a·doko songdongenggipa Kristianrangni kosako sinjetaniko on·aniara, Kristianrangko chonnikani ong·a aro ra·chakna amgijani ong·a, ine NGO-rang ma·mong sorkariko matnangataha.

Batanggipa salrangoba, ‘Good Friday’ ba Jisu Kristo-ko Chisolo datkapani salo, ‘Digital India Day’ ine Kristianrangni olakkiani salko donaha. Apsandaken, Kristianrangni dal·batsranggipa maniani sal chong·motan, Jisu Kristoni Atchiani sal December 25 tariko, ‘Good Governance Day’ ine donenba, pilak office-rango kamrangko ka·ataha.

Iandake, Meghalaya a·doko songdongenggipa Kristianrangko dingtangmancha nisan done, sinjetaniko on·aniara, Kristianrangko mikchepani aro bebe ra·enggipa Kristian manderangni gisikko namen sa·dikatani ong·a. Uni gimin mikkangchiba, Robibar salrango kam ka·atanirangko raken champengangkugen aro olakkiani salrango kam ka·na on·jawa, ine NGO-rang parakataha.