Baghmara, Sep 25, 2026:: National Highway (NH)-62 (217) rama namsrangjahani gimin, ua ramako tarie on·china dabie, South Garo Hills a·jani nangrimgimin NGO-rang, salgnina Non-Cooperation Movement (NCM)-ko ong·atani da·al September 25 tariko tom·tome matchotangaha. Uandaken, re·anggipa September-ni 2 aro 3 tarikoba, salgnina NCM-ko ong·atangaha, indiba a·dok sorkari aro district administration maming aganchakaniko on·jahani gimin, September 4 tariko sal 15 sorkarina somoiko on·taiahachim.

Indake ong·genchimoba, a·dok sorkari NGO-rangni dabianiko maming dakeba knachakteljahani gimin, September 24 aro 25 tariko changsatai salgnina jingjengataniko ong·attaiaha. Batanggipa Congress-ni chasongo Dr Mukul Sangma bilsi 8-na Skotong Minister ong·aha, ua somoioba South Garo Hills-ni dilsamangmang ramako galchipaha aro da·o Conrad Sangma-ni Skotong Minister ong·e dilenggipa MDA sorkariba ia NH-62 (217) ramako tarigija donchipengani gimin, South Garo Hills-ni nangrimgimin dingtang dingtang NGO-rang, jekai FKJGP, ADE, AYWO, AHAM, NGCO, APA aro ADIL NH-62 (217) ramako ta·rake tarichina dabie gnigipa changna NCM-ko ong·ate jingjengatangtaiaha.

NGO-rangni parakatani gitade, ia NH-62 (NH-217) rama namsrangjahani a·sel, South Garo Hills a·jao songdongenggipa manderang, songre songgabatgiparang, dingtang dingtang kamrangna re·a doanio, bading chiwalani kamrango namen neng·nikanirangko chagrongna nangtokenga.

South Garo Hills-o mongsongbate neng·nikaniara re·a doani rama jal·langan ong·enga. Indake neng·nikaniko man·engoba, ia ramako da·onan tarina a·bachengatkuja ine parakatenba, NGO-rang, September-ni 24 aro 25 tarikrango pring 5 bajioni attam 5 bajiona, Baghmara, Nongalbibra, Chokpot, Rongara, Gasuapara biaprango salgnina NCM-ko ong·atani da·alo tom·tome matchotangaha.