Shillong, Aug 20: August 19 tarikni walo Khasi Students Union (KSU)-ni dilgiparangko rim·anichi chatro chatrirangni dabianirangko sorkari bilgriatna man·jawa, indiba KSU-ni ming bonga (5) dabianirangko chu·sokatna bilakbate jingjengatanggen, ine Bristibar salo, KSU-ni gitcham President Lambokstarwell Marngar aganaha.

Budbar salo, KSU-ni black flag bike rally-ko ong·atanio so·sojengjeng ong·anina, KSU-ni President Raymond Kharjana, Vice President Pynkmenlang Sanmiet aro General Secretary Reuben Najiar-ko rim·e, Jaiaw-o donggipa KSU-ni Office-ko pulisrangni chadrapeahani gimin, KSU-ni gitcham President, ia kattarangko aganaha.

KSU-ni office-ko tear gas-rangchi goani a·sel, sambao donggipa nokdangrangna kenjagokataniko ra·baaha ineba ua aganaha.

KSU-de dilgiparang sakgittamsan ong·ja, indiba dingtang dingtang a·jarango aro CEC-oba bang·en dilgiparang donga, pulisrang jekoba rim·na man·aia, indiba uamangni dabianirangkode maming saloba dontongjawa ine Marngar aganaha.

Ia ming bonga (5) dabianirangara gital dabianirang ong·ja, sorkari, ia dabianirangko ta·raken chu·sokatna nanga ineba ua dabiangaha.

KSU-ni jingjengataniara, Assam-o songdongenggipa manderangni kosako jingjengatani ong·ja, manderangni nanganirangko knachakjaengani giminsa Meghalaya sorkarini kosako jingjengatani ong·a, ine KSU-ni gitcham President aganaha.

An·tangtangni dilgiparangko watpilchina, KSU dabigenma ine sing·anina aganchakengon, KSU-ni dabianide ming bonga (5) dabianirangko chu·sokatchinasa sorkario dabienga aro ia dilgiparangko watpiloba watpiljaoba ia dabianirangko dontongjawa ine Marngar aganaha.