Shillong, June 30, 2026: Meghalaya a·dokni nanganirangko chu·sokatna gita gital seokako man·gipa Rajya Sabha MP James Pangsang K Sangma, a·dok sorkari baksa nangrime kamrangko ka·na ku·rachakaha.

Meghalaya Democratic Alliance (MDA) II.0-ni una mande ra·pilskaaniko on·na dingtangmancha tom·aniko ong·atanio a·dokni gital Rajya Sabha MP, ku·rachakaniko on·angaha.

“Meghalaya a·dokni nanganirangko Rajya Sabha-o bilake ku·rang on·na gita anga a·dok sorkari baksa nangrime kamko ka·anggen”, ine Sangma ku·rakchakangaha.

Sangma an·tangko Rajya Sabha MP-na seokahani gimin ua dingtangmancha MDA II.0-ni pilak member-rangko mittelpilangskaaha.

James Sangma-na mande ra·pilskaaniko dakna tom·anio, BJP-ni MLA sakgni, chong·motan AL Hek aro Sanbor Shullai, UDP-ni President aro Cabinet Minister Metbah Lyngdoh, NPP, UDP, HSPDP-ni MLA-rang, Assembly-ni Speaker Thomas A Sangma aro MDA-ni gipin member-rangba dongpae bak ra·angaha.

Tom·a matchotani ja·man, a·dokni Skotong Minister Conrad K Sangma, kobor ra·timgiparangna aganengon, MDA-ni tom·aniko ong·ataniara, manderangni nangchongmotgipa kamrangni gimin, talatanirangko ra·na aro an·tangtangni chanchianirangko aganna cholko on·ani gita ong·aha ine parakataha.

Iandakgipa tom·anirangko ong·ataniara, nangrimgimin dolrangni bakrimaniko mangrakbatatna aro ma·sichakgrikna dakchakaniko on·ani ong·a. Rajya Sabha-ni gital MP-na an·tangni nama skaniko on·angengon, ua Rajya Sabha-o a·dokni nanganirangko bilaken ku·rang on·na man·gen ine Skotong Minister, an·tangni ka·dongchakaniko parakangaha.

Sorkariko chalaiani bidingo sing·anirangna aganchakengon, darang sorkarian walsanode a·doko nangani aro neng·nikanirangko namatna man·jawa, indiba MDA II.0 sorkari, ru·uta bilsirangna matchotgija dongenggipa kamrangko matchotatna man·aha ine Sangma aganaha.

A·doko namroro silroroaniko ra·bana gita NPP-chi dilenggipa MDA II.0 sorkari, rakbee kamrangko ka·angkugen ineba Sangma, ku·rachakangaha