Williamnagar, June 30, 2026:Simsanggre jolo donggipa Nokmarang, NGO-rang, Senior Citizen-rang aro songantini President aro Secretary-rang, June 27 tariko Williamnagar Warimagre Community Hall-o tom·e chanchirimaniko dakangaha.

la tom·anio East Garo Hills a·jani Nokmarang baksa Simsanggre jolo bajar anti cha·enggipa, South Garo Hills a·jani Nokmarangba dongpae chanchirimanio bak ra·angaha aro jatni gimin, ku·rang on·na ku·mongrimangaha.

Tom·aniko Nengsanggre songni Nokma Pa P.Ch.Marak aro Williamnagar Mothers’ Union-ni President Ma. M.S. Marak dilangaha.

Ia chasong gitalo Nokmani A·kingo songdonggipa manderang Nokmani bilko dal·e, ra·gijani ba Nokmarangko bilgriataniko nike NGO-rang suk ong·gijako parakangenba, mikkangchi Nokmarangni bilko bilake rakkiangna gamchate ra·na chakpaaniko on·pana namnike ra·chakangaha. Indake Nokmarangoni saksa Samanda Nokmani kam aro bilko jinmana nambee talatangaha.

Batanggipa 2016 bilsio Meghalaya Sorkari MRSSA-ni niamko tarie ra·gatahaoba, ia niamko ra·gatanichi bang·a namgnirang gnang ine talataniko on·angengon, adita sing·anirang nakataha, jekai chanchianirango
Sixth Schedule-na ra·chakani ong·ama ine sing·doangrokaha.

GHADC-ara approved ka·e Nokmarangna on·jokma ? Maina Nokmani A·kingrangoba, sorkariara, MRSSA Form- B (Section 9.2)-o Local Authority Certify-o songni President ba Secretary ba gipin dilgipani soiko ra·chaka, indide Nokmani bilara bao ineba sing·doangaha.

Re·anggipa 2016 bilsio je niamrangko tarie ra·gatahaoba, maina 2026 bilsina skang ra·gatja? Garo Hills-o Garo aro bangal nanggrikani a·sel Mistry ba kam ka·giparang (labour) dongjani gisepon rang·gitik ra·gatskaha.

A-chik jat ska jean kangal nokdangna aro poraigipa chatro chatrirangna, Form-ko gong 500 brena aro Affidavit ka·na nanganiara rakbegipa sinjetani ong·enga. Maina Garo Hills-ni A·chikrang, Affidavit ka·na nangskaa, ine NGO-rang sing·doangengon, pilak dilgiparangan Nokmani A·kingo da·o dipet ra·chakujawa ine parakangaha.

Minggipinara, A·chikrang da·onaba duk mikchian tipkuja, jatni dilgiparang jail pattokonin joktokkuja, janapatenba, niamgri napdrabaenggipa bangalrang salsa bate bate re·bana joton ka·engani gimin, Nokmarang, NGO-rang aro songdonggipa manderang suk ong·gijaniko parakataha.

“Bangalrang A·chik a·songo dongkame bading chiwalna ba saniba ning·o dongkame kam ka·na man·chongmotjawa” ine East Garo Hills a·jani Nokma Association-ni Secretary, parakataha.

Unbaksana AIGU-ni Vice President, “Jena kingking pattoko dongenggipa, Achik Matgrikrangko watkuja, maming dakeba, bangalrang Garo Hills-ona re·bana ba napna man·jawa. Jedake nangrimgimin NGO-rang Batanggipa somoio Skotong Minister-na lekka seataha, apsan daken da·oba dingtangjawa” ine parakataha.

Je dilgiparangan jat aro a·songna kam ka·e, pattoko donako man·engachim, uamangko grongna ba maiba dakchakaniko on·pana namnike bang·a manderangan kusi ong·aniko parakangaha.

“An·chingni dilgiparang ka·dongbee, jatna warachakaha aro rim·a kaako man·e pattoko chipako man·pile an·tangtangko on·kangaha. Da·o uamngni nokdang baditan duk mikchiko chagronenga. Uni gimin, hai uamangko watchina ku·rangko on·na” ine Nokmarangoni saksa jinmako didiangan baksa jatko onchepe ra·anina suk ong·gijaniko parakataha.