Tura, April 12, 2026: Garo Hills Autonomous District Council (GHADC)-o dingtang Electoral Roll-ko tarina ja·ku de·ani bak gita gital, Delimitation Committee-ko dilna sakbri manderangko seokaha, ine GHADC-ni Executive Membor (EM) aro Garo Hills United Alliance (GHUA)-ni ku·wattimgipa Cherak W Momin parakataha.

Momin-ni parakatani gitade, GHADC-ni gital Delimitation Committee-ko dilna, MPSC-ni gitcham member Bebena T Sangma-ko Chairperson-na, GHADC-ni Tourism Officer Briten A Sangma-ko Secretary-na aro ABDK-ni gitcham Vice President Brenethson R Marak baksana gitcham MCS officer Proley M Sangma-ko member dake songaha.

Ia gital Delimitation Committee, jadokni gisepon, GHADC-ni Executive Committee-na an·tangtangni ku·pattianirangko on·anggen, ineba Momin parakataha.

GHADC-ko gital dake tariani bidingo janapatani baksana, GHADC-ni gitcham Executive Committee (EC)-ni maming advertisement gri aro interview-rangko ra·ani gri kamo rakkigipa sak 29 manderangko ra·galpilna gita, gital EC tik ka·aha ine Momin parakataha.

Momin-ni u·iatani gitade, ia manderangara, LDA, Chainman, Hill Mondol, Typist, Sentry, Mondol aro gipin kamrango niamgri rakkiahachim.Una agreba Forest Guard, Peon, Cleaner, Chowkidar aro uandakgipa kamrango sak 39 Casual Employee-rangko gitcham EC Regularize ka·na u·iatani gimin janapatengon, ia kam ka·giparangni bidingo am·sandianirangko dake, uamangna bate kamo bilsi ru·utbate kam ka·gipa Casual Employee-rangkon nichalgalahani gimin gitcham EC-ni on·gipa Regularization Order-ko den·galpilna tik ka·aha ine Momin parakataha.

GHADC-o je manderangan, kamrangko ka·gija dormaha oke cha·engachim, uandakgipa manderangkoba gital Executive Committee, kamtangtangko name ka·china didiataha, ong·jaode kamtangtangko watchina mikrakataniko on·ataha.