Tura, April 4, 2026: Indian National Congress (INC) dolni palo eleksin-ni noksako ra·e, kragija poster tarienba, tol·e giproroatanina, North Garo Hills a·jani Kharkutta Constituency-ni ning·o donggipa Kentra songni saksa Perry Napak minggipa mandeni kosako District Youth Congress (DYC)-ni President Rikrak M. Sangma, Tura Pulis Station-o badi (FIR) ka·doangaha.

Perry Napak-ni tol·e gipatgipa noksao INC dolni gita, Balachanda Constituency-o Sofiur Rehman-ko candidate dakate, una vote-rangko pu·onchina tol·e manderangko didiatahachim. Indake ong·genchimoba ian kakket ong·ja aro ong·gija manderangko dilsretna tarigipa noksasa ong·achim.Ian party-ko nosto ka·na tol·e gipatgipasa ong·a ine DYC-ni President janapataha. Unikoa ua mande, Tura-ni MP Saleng A.Sangma-ni bimingkoba tol·e galona dakgipa mande ong·achim ine Sangma parakataha.

Indake namgija kamrangchi manderangko so·sojengjeng ong·atna aro jatsa jatgipin baksa ding·chaogrikate, tom·tomaniko nosto ka·na miksongani ong·a ineba parakataha.

Ua mande niamko pe·e ong·gija kattarangko tol·e gipatgipa kamrangara, Section 356, Bharatiya Nyaya Sanhita (BNS)-ni ning·o, Section 353 BNS, Section 196 BNS aro Section 318 BNS-ni niamko pe·ani ong·a, ine DYC-ni President parakatenba, dos dakgipa mandeni kosako case-ko segatchina aro niam gita rakgipa ja·kurangko de·china DYC-ni President didiataha.