Gasuapara, Oct 3, 2025: South Garo Hills a·jani Gasuapara C&RD Block-ni ning·o donggipa Kondok songni saksa me·apana wildlife department-ni gita ta·rake dakchakaniko on·china mol·molataha.

Batanggimin, June 13 tariko buringni mongmarang Kondok songona re·bae bang·a nok jamrangko pe·e galangaha aro ua songni me·apa saksa Rajip Koch-ko kal·ake saknaataha.

Ua (Rajip) dingtang dingtang be·enni bakrango saknaako man·aha jakrang, gingtingrang, kangkareni grengrang aro ja·a be·aha, unbaksana uni bikarango an·cherang topaha, uko Tura Civil Hospital-o sanaha.

Indaken ua da·ode, an·sengpilaniko man·aha. Indiba, Rajip Koch skango gita be·enrang mangrakjaha aro raka kamrangko ka·e cha·na man·jaha.
Ua namen bilgriani a·sel nokdangni jik dedrangko aldu mittangna gita namen neng·nikaniko man·engaha ine suk ong·gijaniko parakataha.

Uni gimin, South Garo Hills-ni Wildlife Department, uni man·na nangenggipa compensation-ko ta·rake on·pachina, South Garo Hills-ni Social Activist saksa mol·molataha. Maina uni man·na kragipa tangka paisarangko ta·rake man·pagenchimode, uni nokdangna bang·a dakchakbeani ong·genchim ine Social Activist Clinton R Marak parakataha.

Apsandaken Kondok songo bang·a nok-jamrangko mongmarangni nosto ka·ako man·gipa nokdangrangba da·alonan, Wildlife Department-ni gita maming dakchakanirangko man·kuja. Iani bidingo pilak nanggipa lekkarangkon, department-ni bi·a gitan chu·gimimkon on·manahachim. Uni gimin iarangko ta·raken a·dok sorkari aro South Garo Hills-ni Wildlife Department, nirokatpachina Marak didiataha.