By:www.ghdnews.in

Tura, March 19, 2026: Nangrimgimin A·chik Dol (NAD) mijal March 18 tariko tom·e chanchirimaniko dakenba, A·chik NGO-ni dilgiparangko rim·ahani gimin, a·dok sorkarini kosako raken jegalataha. Rim·a man·gipa dilgiparangara Garoland Statehood Movement Committee (GSMC)-ni Acting Chairman aro NAD-ni Vice President, Te Balkarin Ch. Marak aro ACHIK Organisation-ni dilgipa Pa Johnny A. Marak aro gipin NGO dilgiparangko ta·rake watpilchina dabiangaha.

Ia dilgiparang aro manderang, ong·gija dakna miksonga ong·ja, indiba A·chik jatko chel·chakna aro jatni namgnina miksonge ja·ku de·giparangsa ong·achim. Uamang A·chik jatni man·gnirangko name rakkiangna re·mikkange jegaldilani a·selsa da·alo dos gri dilgiparangko rim·aha ine NAD parakataha.

Ian India-ni Constitution ba niam bidiko segatgimin, Article 244 (2)-o on·gimin Sixth Schedule-ni ning·o tribal manderangna on·gipa niamko aro mikkim gnange rakkiani ong·a. Ia niamrang gipin niamrang gita ong·ja. Ian tribal manderangni biming, a·a, niam-reti, dakbewal rikbewal aro an·tangtangchin sason ka·ani bilko rakkina aro warachakna on·gipa Special Constitutional Safeguard ong·a, ine NAD janapataha.

Mongsongbate ian GHADC eleksin-o A·chik ong·gijagipa manderangni candidate ong·e bak ra·aniko champengani ong·a. Iako dakani miksongara A·chik manderang Tribal Administration aro Representation-ko Constitution-ni on·gimin niamo pangchake rakkiani ong·a. Ia bil aro niamara Constitution-ni mikkimko rakkina nangchongmotgipa ong·a ine NAD parakataha.

Ia niamko manderangna namedake ma·siatna aro India-ni Constitution-ko songdongenggipa sakanti tribal manderangna Fundamental Rights-ko on·aha. Article 19 (1)(a)-ni ning·o, songdonggiparang pilakan an·tangtangni man·gnina aro bilko jakkalani bidingo aganna gita bilko on·manaha. Article 19 (1) (b)-ni ning·o, manderang tom·bimongna aro re·jomaniko dakna gita bilko man·a. Ian chongipa bilrang ong·ja. Iarang gimikan Constitution-ni on·gipa Democratic Rights-rang ong·a, ineba NAD janapataha.

Uni gimin, manderang jensalo tom·tome tom·bimonganiko dakna aro uamangni Constitutional Safeguard-rangna ku·rang on·na aro uamangni ku·rang on·aniko niam gita knachakna nanga, ine janapatenba, “Chinga rim·ako man·gipa dilgiparangni nokdangni manderangna duk ong·chaka. Je nokdangni manderang uamangko bano rakkienga, uko ma·sina man·kujaenga, maina uamangara namgijako dakgiparang ba bobil dolni manderang ong·jachim. Ian A·chik jatna namen kenbeani aro dukko ra·baani ong·a. Uni gimin chinga a·dok sorkari aro pulis department-ko mol·molatemga ta·raken uamangni nokdangna uamangko bano dongenga uko parakatchina aro uamangko grongna cholko on·china dabienga”.

Ia manderangna niam gita kakket bichalko on·na nanga, jedakode
sorkarini kakket aro bebe ong·aniko u·ina man·gen, ia obastako u·igipa ma·sigipa manderang tom·tomanina Constitution-ko mande ra·china NAD sorkariko didiataha.

Sorkaride pangna jolna dongkamgipa ong·ja, indiba manderangde jringjrotnan dongkamgen. A·chikrang pangnan kimkim ong·gen. “Chinga an·tangtangni bimingko nama bewalo rakkigen. Chinga Constitution-ni on·gipa bilrangko pangnan gamchatnikgen. Uni gimin chinga da·alo media-ni gita kakketko dabienga, mikkangchi rim·anirangko dontongchina aro rim·a man·gipa dilgiparang aro gipin manderangko ta·raken watpilchina. Article 244 (2)-o on·gimin Sixth Schedule-ni ning·o donggipa tribal manderangna warachakaniko on·na, uamangko chel·chakna aro Article 19-ni ning·o donggipa mongsonggipa man·gnirangko chel·chakna nanga” ine NAD dabiangaha.