Tura, Mar 3,2025: Tura-ko Winter Capital songchina dabie A·chik State People’s Front (ASPF)-ni gnigipa Awareness Campaign-ko Sonibar salo, South West Garo Hills a·jani Garobadha Merong Bazar-o ong·atangaha.

Ia awareness program-ko ASPF, Garoland State Movement Committee (GSMC), Garobadha jolni Organisation-rang jekai FKJGP Circle, APA, NGCO Garobadha Unit aro songni nokni Nokmarang baksa nangrime ong·ataha.

Ia program-ko ong·atanio, FKJGP Garobadha Circle-ni President Anderson M Marak, jinmana aganprakengon, Tura-ko Winter Capital songaniara Meghalaya a·dokko man·e on·dilanggipa pagitchamrangni ku·rachakgimin kattarang ong·a aro iako chu·sokate on·china a·dok sorkariko didiangaha.

APA Garobadha Unit-ni President Willat Ch Marak-ba jinmana aganprakengon, Tura-ko Winter Capital songchina dabianiko chu·sokatkuja dipet ia dabianio bakrimna ku·rachakangaha.

Uandake ia tom·anio GSMC-ni Acting Chairman Balkarin Ch Marak-ba jinmana aganprakangengon, Tura-ko Winter Capital songchina dabianirang chu·sokkuja dipet dabianiko dontongjawa ine ia dabianio bakrimtokchina pilkakon didiangaha.

Indake ia awareness Program-ko ong·atanio, ASPF-ni General Secretary Bernita Marak-ba jinmana aganprakengon, Garo Hills-o songdongenggipa manderangni namgnina Tura-ko Winter Capital songchina dabianio bakrimaniko on·china Garo Hills-ni pilak MLA aro MDC-rangkoba didiangaha.

“An·tangtangni nanganirangko chu·sokate on·china gitasa Garo Hills-ni manderang, MLA aro MDC-angko seokaha, uni gimin iani bidingo Assembly-o ku·rang on·aniara MLA-rangni daito ong·a” ine Marak, Garo Hills-ni MLA-rangko didiataha.

Bon·kamao Sonamite songni Nokma Agasi Sangma-ni ku·rangchi Isolo bi·e tom·aniko matchotataha.