Tura, Sept 7, 2024: Batanggipa 2005 bilsini September 30 tariko MBOSE, Headquarter-ko Shillong-chi ra·jitangna miksonganiko jegale jinma re·jomna tom·dakmitting somoio pulisrangni silai goanichi guli nangako man·e sianggipa manderangko gisike ra·e, manienggipa September 30, Victims Soliditary Forum (VSF)-ni gital Committee-ko songaha ine VSF-ni Chairman Manseng A.Sangma u·iataha.
Ia gital Committee-ko dilna gita seoka man·gipa dilgiparangara Manseng A.Sangma Chairman, Alexander D.Sangma Vice Chairman, Waldhiem D.Sangma General Secretary, Gregoryn M.Marak Assistant General Secretary, Lorenzo Salkra Marak Organising Secretary, Chingsram Ch.Marak Assistant Organising Secretary aro sakgittam Executive Member-rangko seokangjolaha.
Uandake, re·baenggipa September 30 tariko chang 19-gipa Memorial Prayer Service ba gisik ra·aniko dake tom·bimonganiko ia 30th September Victims Soliditary Forum-ni gital Executive Committee dakdilanggen ine parakataha.
